جۋىردا ەنەرگەتيكا ۆيتسە-ءمينيسترى اسحات حاسەنوۆ قىزىلوردا وبلىسىنا ۇشكۇندىك جۇمىس ساپارى بارىسىندا وبلىس اكىمىنىڭ ءبىرىنشى ورىنباسارى سەرىك قوجانيازوۆپەن بىرگە «بايكەن-U» جشس ۋران ءوندىرۋشى كاسىپورنىنا بارىپ, ۋراندى ءوندىرۋ مەن وڭدەۋدىڭ تولىق تسيكلىمەن, ونىڭ ىشىندە اففيناج زاۋىتىنىڭ جۇمىسىمەن جانە اۋىسىمداعى جۇمىسشىلاردىڭ ەڭبەك, تۇرمىس جاعدايىمەن تانىستى.
جالپى جەر قويناۋىن پايدا-لانۋشىنىڭ جۇمىسىنا وڭ باعا بەرىلىپ, ءوڭىردىڭ الەۋمەتتىك-ەكونوميكالىق دامۋىنا قوسقان ۇلەسى اتاپ ءوتىلدى.
سونداي-اق جۇمىس ساپارى اياسىندا «قازاتومونەركاسىپ» ۇاك» اق جانە ونىڭ قىزىلوردا وبلىسىندا ورنالاسقان ەنشىلەس كاسىپورىندارىنىڭ قاتىسۋىمەن ولاردىڭ قازىرگى قىزمەتى ماسەلەلەرى بويىنشا جۇمىس كەڭەسى ءوتتى.
كەڭەس قورىتىندىسى بويىنشا ەنەرگەتيكا مينيسترلىگىنە ۋران كەن ورىندارىن يگەرۋدى دامىتۋ باعدارلاماسىنىڭ تۇجىرىمدامالارىن جانە كەن ورىندارىنا ىرگەلەس اۋماقتاردا ۋراندى بارلاۋ جوسپارلارىن ۇسىنۋ, سونداي-اق كەن ورىندارىندا ۋران ءوندىرۋ كەزەڭىن ۇزارتۋ ماسەلەسىن پىسىقتاۋ تاپسىرىلدى.
سول كۇنى تۇستەن كەيىن «قازمۇنايگاز» ۇك» اق, «QazaqGaz» ۇك» اق جانە وڭىردەگى كومىرسۋتەكتەر سالاسىنداعى جەر قويناۋىن پايدالانۋشىلارىمەن جۇمىس كەزدەسۋى ءوتتى.
«قازمۇنايگاز» ۇك» اق-عا تورعاي-پالەوزوي ۋچاسكەسىندە ۇڭعىمانى بۇرعىلاۋ بويىنشا جۇمىستى جەدەلدەتۋ ۇسىنىلدى. «QazaqGaz» ۇك» اق-عا جانە «قازگەرمۇناي» بك» جشس-عا وڭتۇستىك اقساي كەن ورنىن جەدەل پايدالانۋعا بەرۋ جونىندە شارالار قابىلداۋ تاپسىرىلدى.
كەشە ۆيتسە-مينيستر ءوڭىر تۇرعىندارىمەن جانە كوممەرتسيالىق ەمەس ۇيىمدارمەن كەزدەسىپ, ازاماتتارعا جەكە قابىلداۋلار وتكىزىپ, جۇمىس ساپارىنىڭ قورىتىندىسى بويىنشا بۇقارالىق اقپارات قۇرالدارىنىڭ وكىلدەرىنە بريفينگ ۇيىمداستىردى.