استانادا روبوت-تەحنيكادان ورتالىق ازيا چەمپيوناتى ءوتىپ جاتىر

چەمپيونات ءۇش جاس ساناتىندا وتەدى: 6-10 جاس ارالىعىنداعى بالالارعا ارنالعان First LEGO League Explore, 10-16 جاس ارالىعىنداعى FIRST Lego League Challenge جانە 12-18 جاس ارالىعىنداعى FIRST Tech Challenge. جەڭىمپازدار حالىقارالىق كەزەڭدە امەريكانىڭ حيۋستون قالاسىنا ەل نامىسىن قورعاۋعا اتتانادى.

«بيىلعى ماۋسىم ەنەرگيانىڭ وزەكتى تاقىرىبىنا ارنالعان. FIRST جارىستارىنىڭ بىرەگەيلىگى روبوتتاردى باعدارلامالاۋ مەن قۇراستىرۋدان بولەك بالالار يننوۆاتسيالىق جوباسىمەن جۇمىس ىستەپ, ءوز قاۋىمداستىعىنىڭ وزەكتى ماسەلەلەرىنە ينجەنەرلىك شەشىمدەر جاساپ جاتىر», دەپ اتاپ ءوتتى Ustem Robotics قورىنىڭ باسشىسى اسىلبەك مىرزاحمەتوۆ. 

ويىن ۇيىمداستىرۋشىلارىنىڭ ايتۋىنشا, وتكەن جىلدىڭ سوڭىنان باستاپ ءار كوماندا #FIRSTKZ2023 حەشتەگىمەن الەۋمەتتىك جەلىلەردە كوپتەگەن تاپسىرمالاردى ورىندادى, سونىڭ ىشىندە بالالار ءارتۇرلى ەنەرگەتيكالىق ستانتسيالاردان ناقتى رەپورتاجدارمەن جۇمىس ىستەدى, ساراپشىلاردان سۇحبات الدى, وقۋ ورىندارىندا پرەزەنتاتسيالار مەن شەبەرلىك سىنىپتارىن وتكىزدى. وقۋشىلار جارىسقا دايىندىق اياسىندا جوعارى وقۋ ورىندارىنىڭ ستۋدەنتتەرىمەن ءوز تاجىريبەلەرىمەن ءبولىستى. 

جىل سايىن روبوتوتەحنيكامەن اينالىساتىن بالالاردىڭ سانى ارتىپ كەلەدى. وسى باعىتتاعى بارلىق تاراپتاردىڭ ۇيلەسىمدى جۇمىسىنىڭ ناتيجەسىندە 2022 جىلدىڭ قازان ايىندا قازاقستان وقۋشىلارى جەنەۆاداعى روبوتوتەحنيكا بويىنشا first GLOBAL CHALLENGE بۇكىلالەمدىك جارىستارىندا جەڭىسكە جەتتى. كەيىنىرەك قازاقستاندىق وقۋشىلار العاش رەت دورتمۋندتاعى روبوت-تەحنيكا بويىنشا حالىقارالىق وليمپيادادا ەكىنشى ورىنعا يە بولدى.

FIRST Robotics دۇنيەجۇزىلىك قوزعالىسىنىڭ ىرىكتەۋ ماتچتارى استانا, الماتى, شىمكەنت جانە ورال قالالارىندا ءوتتى. ولارعا 2 مىڭنان استام وقۋشى قاتىستى. سوڭعى 3 جىلدا قازاقستاندا 3 مىڭنان استام روبوت-تەحنيكا كابينەتى اشىلدى. ەكى مىڭنان استام مۇعالىم روبوت-تەحنيكا كۋرستارىنان ءوتتى.

ورتالىق ازيا چەمپيوناتى ءۇش كۇنگە سوزىلادى. ويىنداردىڭ رەسمي جابىلۋى 26 اقپاندا وتەدى.