پرەزيدەنت جانىنداعى مەملەكەتتىك باسقارۋ اكادەمياسى مەن ەلدەگى جوعارى وقۋ ورىندارى مەملەكەتتىك باسقارۋ سالاسىنىڭ ماماندارىن بىرلەسە دايارلايتىن بولدى. بۇگىن تاراپتار رەسمي قۇجاتقا قول قويدى, دەپ حابارلايدى Egemen.kz.
ناقتىراق ايتساق, «مەملەكەتتىك باسقارۋ», «مەملەكەتتىك جانە جەرگىلىكتى باسقارۋ» جانە «ادامي رەسۋرستاردى باسقارۋ» باعىتتارى بويىنشا ماماندار دايارلانباق.
ءىس-شاراعا قاتىسقان مەملەكەتتىك قىزمەت ىستەرى اگەنتتىگى توراعاسىنىڭ ورىنباسارى ازامات جولمانوۆ: «مەملەكەتتىك قىزمەت ىستەرى اگەنتتىگى اشىق, ءادىل, قوعامنىڭ سۇرانىسىنا ساي قىزمەت كورسەتەتىن, زاماناۋي تالاپتارعا يكەمدى مەملەكەتتىك اپپاراتتى قالىپتاستىرۋ باعىتىندا ءتيىستى جۇمىستاردى اتقارىپ جاتىر. بۇگىنگى مەموراندۋم مەملەكەتتىك قىزمەتتى باسقارۋدى دامىتۋعا, مەملەكەتتىك قىزمەت سالاسىن مودەرنيزاتسيالاۋعا, HR تەحنولوگيالار مەن قۇرالدارلى كەڭىنەن قولدانۋعا نەگىز بولاتىنىنا سەنىمدىمىن», دەپ پىكىرىن ءبىلدىردى.
ال عىلىم جانە جوعارى ءبىلىم ءمينيسترى ساياسات نۇربەك ەلىمىزدە مەملەكەتتىك باسقارۋ سالاسى, HR قىزمەتى بويىنشا عىلىمي زەرتتەۋلەر جۇرگىزىلۋى كەرەك ەكەنىن اتاپ ءوتتى.
«قازىرگى تاڭدا ەلىمىزدە 30-دان استام جوعارى وقۋ ورنى مەملەكەتتىك باسقارۋ سالاسى بويىنشا مامان دايارلايدى. مەملەكەت باسشىسىنىڭ تاپسىرمالارىن ورىنداۋ اياسىندا مەملەكەتتىك قىزمەت ىستەرى اگەنتتىگىمەن جانە مەملەكەتتىك باسقارۋ اكادەمياسىمەن بىرلەسە وتىرىپ, ءبىلىم باعدارلاماسىن جاڭارتۋىمىز قاجەت. مەملەكەتىك باسقارۋ جۇيەسىن قايتادان زەرتتەۋىمىز كەرەك. سەبەبى تسيفرلىق كۇش كوپ نارسەنى وزگەرتىپ جاتىر. ال مەملەكەتتىك قىزمەت جاھاندىق وزگەرىستەرگە دايىن بولۋى كەرەك. بىرلەسكەن جۇمىستىڭ اياسىندا ماگيسترانتتار مەن دوكتورانتتار مەملەكەتتىك قىزمەت جۇيەسى, HR قىزمەتى بويىنشا قولدانبالى زەرتتەۋلەرمەن اينالىساتىن بولادى», دەدى مينيستر.
وسىعان وراي الداعى ۋاقىتتا اكادەميا مەن مەموراندۋم جاساسقان جوو ورتاق زەرتتەۋلەر جۇرگىزىپ, ءبىلىم بەرۋ باعدارلامالارىن بىرلەسە ازىرلەۋ جانە قولدانىسقا ەنگىزۋ, مەملەكەتتىك باسقارۋ جانە HR سالاسى بويىنشا ساراپشىلار پۋلىن قۇرۋدى قولعا الماق.
«بۇگىن جوعارى وقۋ ورىندارىنىڭ رەكتورلارىمەن جانە وكىلدەرىمەن كەزدەسىپ, كاسىبي مەملەكەتتىك اپپاراتتى قالىپتاستىرۋ پروتسەسىن كادرلىق جانە ەكسپەرتتىك قامتاماسىز ەتۋ بويىنشا ماڭىزدى ماسەلەلەردى تالقىلادىق. ۋنيۆەرسيتەتتەردىڭ الەۋەتىن بىرىكتىرۋ جانە جوعارى وقۋ ورنىنان كەيىنگى ءبىلىمى بار مامانداردى دايارلاۋ مەملەكەتتىك ساياساتتىڭ ستراتەگيالىق باسىمدىقتارىن ىسكە اسىرۋعا سەپتىگىن تيگىزەدى», دەدى پرەزيدەنت جانىنداعى مەملەكەتتىك باسقارۋ اكادەمياسىنىڭ رەكتورى ەرلان ءابىل.
قۇجاتقا قول قويۋ راسىمىنەن كەيىن تاراپتار مەموراندۋم اياسىندا جۇزەگە اسىرىلاتىن ءىس-شارالار بويىنشا دايىندالعان جول كارتاسىن تالقىلادى. ەندى جوعارى وقۋ ورىندارىنىڭ دوكتورانتتارى مەن ماگيسترانتتارى مەملەكەتتىك ورگانداردا تاجىريبەدەن جانە تاعىلىمدامادان وتۋگە مۇمكىندىكتەرى بار.