ورتالىق سايلاۋ كوميتەتى كەزەكتەن تىس سايلاۋدا ءماجىلىس جانە ءماسليحات دەپۋتاتتىعىنا كانديداتتاردىڭ رەسپۋبليكالىق بيۋدجەتتەن جابىلاتىن شىعىستارىنىڭ مولشەرىن بەكىتتى, دەپ حابارلايدى Egemen.kz.
وسك مۇشەسى ءسابيلا مۇستافينا ناقتىلاعانداي, رەسپۋبليكالىق بيۋدجەت قاراجاتىنان كانديداتتاردىڭ سايلاۋالدى باعدارلامالارمەن باق-تا سويلەۋگە, سايلاۋ الدىنداعى جاريا ءىس-شارالاردى وتكىزۋگە جانە ۇگىت ماتەريالدارىن شىعارۋعا ارنالعان شىعىستارى, سونداي-اق كانديداتتاردىڭ وسك بەلگىلەيتىن مولشەردەگى كولىك شىعىستارى جابىلادى. پارتيالىق تىزىمدەر بويىنشا ۇمىتكەرلەرگە رەسپۋبليكالىق بيۋدجەت قاراجاتىن ءبولۋ كوزدەلمەيدى.
«پارلامەنت ءماجىلىسىنىڭ دەپۋتاتتىعىنا كانديداتتار ءۇشىن پارتيالىق تىزىمدەر بويىنشا ۇمىتكەرلەردەن باسقا شىعىستاردىڭ مولشەرى 950 000 تەڭگە كولەمىندە بەلگىلەنەدى. ونىڭ ىشىندە باعدارلامامەن تەلەديدار مەن راديودا سويلەۋگە, سونداي-اق مەرزىمدى باسپاسوزدە نەمەسە جەلىلىك باسىلىمداردا 2 ماقالا جاريالاۋعا – 450 000 تەڭگە, جاريا ءىس-شارالار وتكىزۋگە جانە ۇگىت ماتەريالدارىن شىعارۋعا - 300 000 تەڭگە, كولىك شىعىستارىنا - 200 000 تەڭگە», دەدى وسك مۇشەسى سابيلا مۇستافينا.
وبلىستىق, رەسپۋبليكالىق ماڭىزى بار قالالار مەن استانا ءماسليحاتتارىنىڭ دەپۋتاتتىعىنا كانديداتتار ءۇشىن پارتيالىق تىزىمدەر بويىنشا ۇمىتكەرلەردەن باسقا شىعىستار مولشەرى 550 000 تەڭگە كولەمىندە بەكىتىلدى. ونىڭ ىشىندە باعدارلامامەن تەلەديداردا, راديودا سويلەۋگە, مەرزىمدى باسپا نەمەسە جەلىلىك باسىلىمداردا 2 ماقالا جاريالاۋعا - 350 00 تەڭگە, سايلاۋ الدىنداعى جاريا ءىس-شارالاردى وتكىزۋگە جانە ۇگىت ماتەريالدارىن شىعارۋعا – 130 000 تەڭگە جانە كولىك شىعىستارى - 70 000 تەڭگە.
رەسپۋبليكالىق بيۋدجەتتەن جابىلاتىن شىعىستار قالالىق ماسليحاتتارعا كانديداتتار ءۇشىن 350 000 تەڭگە مولشەرىندە بەكىتىلدى. ونىڭ ىشىندە باعدارلامامەن تەلەديداردا, راديودا سويلەۋگە, مەرزىمدى باسپا نەمەسە جەلىلىك باسىلىمداردا 2 ماقالا جاريالاۋعا - 200 00 تەڭگە, سايلاۋ الدىنداعى جاريا ءىس-شارالاردى وتكىزۋگە جانە ۇگىت ماتەريالدارىن شىعارۋعا – 100 000 تەڭگە جانە كولىك شىعىستارىنا - 50 000 تەڭگە بەلگىلەندى.
وسك اتاپ وتكەندەي, بارلىق ەسەپتەۋلەر باق جانە باسقا ۇيىمدار ۇسىنعان باعالاردى تالداۋ نەگىزىندە جاسالعان.