قر وسك وتىرىسىندا 2023 جىلعى 19 ناۋرىزعا تاعايىندالعان ءماجىلىس جانە بارلىق دەڭگەيدەگى ءماسليحاتتار دەپۋتاتتارىن سايلاۋ ءۇشىن سايلاۋشىلار ءتىزىمىن قالىپتاستىرۋ ماسەلەلەرى تالقىلاندى, دەپ حابارلايدى Egemen.kz.
قر وسك توراعاسىنىڭ ورىنباسارى كونستانتين پەتروۆ اتاپ وتكەندەي, ورتالىق سايلاۋ كوميسسياسى سايلاۋشىلار ءتىزىمىن جىلىنا ەكى رەت 1 قاڭتار مەن 1 شىلدەدە جاڭارتادى.
«2023 جىلعى 1 قاڭتارداعى جاعداي بويىنشا ءبىز سايلاۋشىلار تىزىمىنە 11 970 406 سايلاۋشىنى ەنگىزدىك, ولار تۇراقتى تۇراتىن ۋچاسكەلەر بويىنشا الدىن الا بولىنگەن. سايلاۋشىلاردىڭ ەڭ كوپ سانى – تۇركىستان وبلىسىندا (1 177 507), ەڭ ازى – ۇلىتاۋ وبلىسىندا (138 277)», دەدى كونستانتين پەتروۆ.
ەسكە سالا كەتسەك, پرەزيدەنت قاسىم-جومارت توقاەۆتىڭ جارلىعىمەن پارلامەنت ءماجىلىسى دەپۋتاتتارىن سايلاۋ 19 ناۋرىزعا تاعايىندالدى. وسك شەشىمى بويىنشا ءماجىلىس پەن بارلىق دەڭگەيدەگى ءماسليحاتتار دەپۋتاتتارىن سايلاۋ ءبىر كۇندە وتەدى.