ەلىمىزدە قانت قىزىلشاسىنىڭ ەگىس كولەمى ۇلعايادى

«وبلىس اكىمدىكتەرىنىڭ مالىمەتى بويىنشا 2023 جىلعا ارنالعان ەگىس القاپتارىنىڭ بولجامدى كولەمى 23,2 ملن گەكتاردى قۇرادى. ءداندى جانە بۇرشاق داقىلدارىنىڭ ەگىس القاپتارىن 171,3 مىڭ گەكتارعا, قانت قىزىلشاسىن 6,7 مىڭ گەكتارعا ۇلعايتۋ جوسپاردا بار. سونداي-اق كوكونىس جانە باقشا داقىلدارىنىڭ 10,2 مىڭ گەكتارعا ارتۋى بولجانىپ وتىر», دەدى ەربول قاراشوكەەۆ اۋىل شارۋاشىلىعى مينيسترلىگى القاسىنىڭ كەڭەيتىلگەن وتىرىسىنان كەيىن.

ونىڭ ايتۋىنشا, بيىل كۇرىش پەن ماقتادان بولەك, بىرنەشە مايلى داقىلداردى ەگۋ كولەمى قىسقارادى.

«ىلعالدى كوپ قاجەت ەتەتىن داقىلدارعا كەلەتىن بولساق, بيىل ماقتا القاپتارىن وتكەن جىلمەن سالىستىرعاندا 13,8 مىڭ گەكتارعا قىسقارتۋ جوسپارلاندى. ۇكىمەتتىڭ سۋدى كوپ قاجەت ەتەتىن ەگىستىك القاپتارىن قىسقارتۋ تۋرالى تاپسىرماسىنا قاراماستان, وتكەن جىلمەن سالىستىرعاندا كۇرىش القاپتارى 9,9 مىڭ گەكتارعا ارتتى», دەدى مينيستر.

ونىڭ ايتۋىنشا, قىزىلوردا جانە تۇركىستان وبلىستارىنىڭ اكىمدىكتەرى بۇل ماسەلەنى باقىلاۋدا ۇستاۋى قاجەت. مايلى داقىلدار بويىنشا دا 191 مىڭ گەكتار القاپتى قىسقارتۋ جوسپاردا بار.