2022 جىلدىڭ قورىتىندىسى بويىنشا قازاقستاندا جەڭىل ونەركاسىپتەگى ءوندىرىس كولەمى 6%-عا ارتىپ, 178 ملرد تەڭگەگە جەتتى, دەپ حابارلايدى Egemen.kz يدم-گە سىلتەمە جاساپ.
ناقتىراق ايتساق, توقىما بۇيىمدارىنىڭ ءوندىرىسى 5,3%-عا, كيىم ءوندىرىسى 7,8%-عا, سونداي-اق بىلعارى جانە ونىمەن بايلانىستى ونىمدەردىڭ كولەمى 3,7%-عا وسكەن.
بۇگىندە جەڭىل ونەركاسىپتى دامىتۋعا ايرىقشا باسىمدىق بەرىلىپ وتىر. سەبەبى بۇل سالانىڭ حالىقتى جۇمىسپەن قامتۋدا اسەرى زور. ماسەلەن, 2022 جىلى جالپى قۇنى 9,9 ملرد تەڭگەگە 6 ينۆەستيتسيالىق جوبا ىسكە اسىرىلىپ, ءوندىرىس ورىندارىندا 560-تان استام جۇمىس ورنى اشىلدى.
مىسالى, «وڭتۇستىك» ارنايى ەكونوميكالىق ايماعىندا ورنالاسقان كىلەم جانە كىلەم بۇيىمدارىن شىعاراتىن «بال تەكستيل» كاسىپورنى 4-ءشى تسەحىن ىسكە قوسىپ, 40-قا جۋىق ادام جۇمىسپەن قامتىلدى. تارتىلعان ينۆەستيتسيانىڭ كولەمى – 2,5 ملرد تەڭگە. قازىر اتالعان فابريكانىڭ وندىرىستىك قۋاتى جىلىنا 4 مىڭ توننا پوليپروپيلەن ءجىبى مەن 5 ملن شارشى مەتردەن استام كىلەم جانە كىلەم بۇيىمدارىن شىعارۋعا قاۋقارلى. وندىرىستە 1,5 مىڭنان ارتىق ەرەكشە ديزاين تۇرلەرى, ونىڭ ىشىندە اۆانگارد, حاي-تەك, پوستمودەرن جانە ۇلتتىق ستيلدەگى ورنەكتەر قولدانىلىپ ءجۇر. فابريكانىڭ ونىمدەرى TURAN, حان-ءتاڭىرى, الاتاۋ, Bars, سارىارقا, ۇلىتاۋ, الاش, وتىرار ماركالارىمەن شىعارىلىپ, الەمدىك دەڭگەيدەگى ساپاعا سايكەس كەلەدى. وعان ISO 9001-2009 سايكەستىك سەرتيفيكاتى دالەل بولا الادى.
سونىمەن قاتار بىلتىر اقتوبە تىگىن فابريكاسى دا ءوندىرىسىن كەڭەيتىپ, 130 جۇمىس ورنىن اشتى. 2020 جىلدان باستاپ جۇمىس ىستەپ كەلە جاتقان بۇل كومپانيا ساپالى ءارى قولجەتىمدى ونىمدەردىڭ ءوندىرىسىن جولعا قويعان. قىسقا ۋاقىتتا كاسىپورىن سەنىمدى تاۋار ءوندىرۋشى رەتىندە بەدەلگە يە بولدى. ءوز كەزەگىندە كاسىپورىن شىعارىلاتىن ونىمدەردىڭ ساپالىعىنا كەپىلدىك بەرەدى. ويتكەنى دايىن ونىمدەر كوپدەڭگەيلى تەكسەرۋدەن وتكىزىلىپ تۇرادى. ءونىم مودەلدەرىن ازىرلەۋگە ديزاينەرلەر, تەحنولوگتار جانە تىگىنشىلەردەن جاساقتالعان بىلىكتى قىزمەتكەرلەر قاتىسادى.
بۇدان بولەك Azala Cotton فابريكاسى ارالاس يىرىلگەن ءجىپ ءوندىرىسىن ىسكە قوسىپ, 200 جۇمىس ورنىن قۇردى. ەستەرىڭىزگە سالا كەتەيىك, اتالعان كومپانيا 2017 جىلى قۇرىلعان. قازىر وندا شىعارىلاتىن دايىن ءونىم شىعىس ەۋروپاعا, رەسەيگە, تۇركياعا جانە قىتايعا ەكسپورتتالادى.
وسى ورايدا ەلىمىزدە جەڭىل ونەركاسىپتى دامىتۋدىڭ 2022-2025 جىلدارعا ارنالعان جول كارتاسى بەكىتىلگەنىن ايتا كەتكەن ورىندى. بۇل قۇجات نورماتيۆتىك قۇقىقتىق بازانى جەتىلدىرۋدى, شيكىزات بازاسىن دامىتىپ, وڭدەۋ سالاسىن جولعا قويۋدى, مەملەكەتتىك قولداۋ شارالارى مەن كادرلىق قامتاماسىز ەتۋدى, جەڭىل ونەركاسىپ تاۋارلارىن تاڭبالاپ, قاداعالاۋدى, سونداي-اق وتاندىق وندىرۋشىلەردىڭ وندىرىستىك قۋاتىن ارتتىرۋ مەن ينۆەستيتسيا تارتۋدى جانە الەمدىك تاجىريبەنى ەنگىزۋ مەن ەكسپورتتى دامىتۋدى كوزدەيدى.