پراۆوسلاۆيە شىركەۋلەرىندە 19 قاڭتارعا قاراعان ءتۇنى كرەششەنيە ءىس-شاراسى اتاپ وتىلەدى. ەلوردادا مۇنداي ءىس-شاراعا قاتىسقىسى كەلەتىندەر ءۇشىن ارنايى جابدىقتالعان ورىندار دايىندالدى. ەلوردانىڭ جۇزدەگەن تۇرعىندارى مەن قوناقتارى جاپپاي شومىلۋ ورىندارىنا جينالدى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
سۋ قويمالارىندا پراۆوسلاۆيە باعىتىن ۇستاناتىندار كرەششەنيە راسىمىنەن ءوتتى. ەلوردادا وسىعان بايلانىستى بىرنەشە ورىن انىقتالدى.
ارنايى جاسالعان ويىقتار ەسىل وزەنىنىڭ وڭ جاعالاۋىندا, م.وتەمىسوۆ اتىنداعى وقۋشىلار سارايى, «گراند الاتاۋ» تۇرعىن ءۇي كەشەنى ماڭىندا جانە جاعالاۋ اۋدانىندا جاسالعان.
بۇل ءىس-شارا استانالىقتار اراسىندا وتە تانىمال. ولار مۇزدى ويىققا تۇسەر الدىندا حالات پەن سۋعا تۇسەتىن كيىمىن كيۋ ءۇشىن ارنايى ورناتىلعان شاتىرلاردىڭ جانىنا جينالدى.
سۋ ايدىندارىنىڭ جانىندا پوليتسيا قىزمەتكەرلەرى, ەلوردالىق توتەنشە جاعدايلار دەپارتامەنتىنىڭ قىزمەتكەرلەرى جانە جەدەل جاردەم بريگاداسى كەزەكشىلىك ەتتى. ولاردىڭ ايتۋىنشا, ۇسىك شالۋ مەن جاراقاتتانۋدى بولدىرماۋ ءۇشىن جابدىقتالماعان جانە بەلگىلەنبەگەن ورىنداردا سۋعا تۇسپەگەن ءجون.
ەلوردالىق تجد قىزمەتكەرلەرى قاۋىپسىز كۇيدە سۋعا ءتۇسىپ شىعۋ ءۇشىن اعاشتان جاسالعان باسپالداق ورناتىلعانىن ءتۇسىندىردى. ولار ايازدى كۇندەرى كرەششەنيە ءىس-شاراسىنان وتەتىن جۇرتقا اعاش تۇتقالاردى ۇستاپ, باسپالداقتان الىستاماۋ كەرەكتىگىن ەسكەرتتى.
كرەششەنيە وتەتىن ويىقتىڭ ماڭى ارنايى جابدىقتارمەن جانە كيىنۋگە ارنالعان ورىندارمەن جابدىقتالعان. قاجەت بولعان جاعدايدا قۇتقارۋشىلار مەن دارىگەرلەر سۋعا تۇسكەندەردى جىلىتۋ پۋنكتەرىنە ورنالاستىرۋعا جانە مەديتسينالىق كومەك كورسەتۋگە دايىن.
ءىس-شاراعا ءتۇرلى جاستاعى ادامدار وتباسىلارىمەن قاتىستى. ولار مۇزدى سۋعا تۇسكەنىن بىلايشا ءتۇسىندىرىپ بەردى.
«كرەششەنيە ءىس-شاراسىنا ەكىنشى رەت قاتىسىپ تۇرمىن. سۋىق سۋ دەنساۋلىققا وتە پايدالى. باستاپقىدا تىنىسىڭ تارىلىپ, توڭىپ كەتكەنىڭمەن كوپ ۇزاماي دەنەڭە جىلۋ بارادى», دەدى ەلوردا تۇرعىنى الەكساندر كاتكوۆ.
ەستەرىڭىزگە سالا كەتەيىك, كرەششەنيە ءىس-شاراسى 19 قاڭتار كۇنى تاڭعى 08:00-دەن 20 قاڭتار كۇنى ساعات 02:00-گە دەيىن جالعاسادى.