عىلىم جانە جوعارى ءبىلىم ءمينيسترى ساياسات نۇربەك اقش-قا جۇمىس ساپارىنىڭ سوڭعى كۇنىن Harvard University وكىلدەرىنىڭ كەزدەسۋىمەن اياقتادى. ءىس-شارا بارىسىندا گارۆارد ستۋدەنتتەرىنىڭ قازاقستاندا تاعىلىمدامادان ءوتۋى تۋرالى ۋاعدالاستىققا قول جەتكىزىلدى, دەپ حابارلايدى Egemen.kz.
تارقاتىپ ايتساق, ءىسساپاردىڭ سوڭعى كۇنىندە مينيستر Harvard Innovation Lab, The New England Commission of Higher Education, Davis Center fo Russia and Eurasia studies Harvard Kennedy School باسشىلىعىمەن, دۋگلاس ديللون اتىنداعى مەملەكەتتىك باسقارۋ پروفەسسورى گرەم الليسون جانە گارۆارد كەننەدي مەكتەبىنىڭ حالىقارالىق قارجى جانە دامۋ جونىندەگى Sumitomo - FASID پروفەسسورى, حالىقارالىق دامۋ ورتالىعىنىڭ ديرەكتورى ازيم كحۆادجامەن كەزدەسۋ وتكىزدى.
ازيم كحۆادجا قوناقجايلىق تانىتىپ ءمينيستردى ءوزى باسقاراتىن ورتالىقتىڭ قىزمەتىمەن تانىستىردى. ول ءوزىنىڭ قىزىعۋشىلىعىن اتاپ ءوتىپ, ىنتىماقتاستىقتى قازاقستانداعى گارۆارد ستۋدەنتتەرىنىڭ تاعىلىمداماسىنان باستاۋدى ۇسىندى. مينيستر ساياسات نۇربەك بۇل باستامانى قولدادى.
ايتا كەتەيىك, تاراپتار جوعارى وقۋ ورىندارىنىڭ ءبىلىم الۋشىلارى مەن عالىمدارىمەن الماسۋ مۇمكىندىگىن قاراستىراتىن جوبالاردى تالقىلادى.
بۇل ىنتىماقتاستىقتى ءارى قاراي دامىتۋ ءۇشىن ساياسات نۇربەك پروفەسسور ازيم كحۆادجانى ەلىمىزگە شاقىردى. ءوز كەزەگىندە ازيم كحۆادجا بۇل شاقىرتۋدى قۋانا قابىل الدى.
گۇلشاحرا سانسىزباي