بەسىنشى قاباتتان قۇلاعان قىزدى قۇتقارعان المات ءامىرحانوۆ اۋرۋحانادان شىقتى, دەپ حابارلايدى Egemen.kz.
بۇگىن وعان كوڭىلىن سۇراپ, ارىپتەستەرى بارىپ قايتتى.
- جەكە قۇرام اتىنان تەزىرەك تولىق ساۋىعىپ, قىزمەتكە ورالۋىڭدى تىلەيمىز. ءبىز پوليتسيا قاتارىندا ازاماتتاردىڭ قاۋىپسىزدىگىن قامتاماسىز ەتۋ بويىنشا ءوز بورىشىن لايىقتى ورىندايتىن وسىنداي قىزمەتكەرلەردىڭ بارىن ماقتان تۇتامىز, - دەدى ارقالىق قالاسى پب باستىعىنىڭ ورىنباسارى پوليتسيا پودپولكوۆنيگى نۇربول مارقاباي ۇلى.
ەسكە سالايىق, 7 قاڭتاردا پاترۋلدىك پوليتسيا قىزمەتكەرى كوپقاباتتى ءۇيدىڭ بالكونىنان قۇلاعان قىزدى قۇتقارعاننان كەيىن بىرنەشە جەرىن جاراقاتتاپ, اياعىنان زاقىم العان بولاتىن.
- قولداۋلارىڭىز ءۇشىن راحمەت. ەلىمىزدىڭ ءتۇرلى ايماقتارىنان كوپتەگەن جىلى لەبىزدەر جەتىپ جاتىر. مەن ءۇشىن قاتتى ۋايىمداعاندارىنا ريزامىن. قازىر ءوزىمدى جاقسى سەزىنەمىن, قىزمەتكە شىعۋعا دايىندالىپ جاتىرمىن, - دەدى پوليتسيا اعا لەيتەنانتى.