مەملەكەت باسشىسىنا ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيا ماتەريالدارىنىڭ نەگىزىندە دايىندالعان كوپتومدىق تانىستىرىلدى, دەپ حابارلايدى Egemen.kz اقورداعا سىلتەمە جاساپ.
پرەزيدەنت قاسىم-جومارت توقاەۆ مەملەكەتتىك كەڭەسشى ەرلان قاريننىڭ ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ جۇمىسى تۋرالى ەسەبىن تىڭدادى. مەملەكەتتىك كوميسسيانىڭ قىزمەتى عىلىمي-زەرتتەۋ جۇمىستارىنا باعىتتالعان.
بەلگىلى عالىمدار مەن ساراپشىلاردان قۇرىلعان كوميسسيا مۇشەلەرى ەلىمىزدىڭ ارحيۆتەرىندە, جابىق قورلاردا اۋقىمدى زەرتتەۋلەر جۇرگىزدى. قۇزىرلى مەملەكەتتىك ورگاندارمەن بىرلەسىپ, ۆەدومستۆولىق ارحيۆتەردى قۇپياسىزداندىرۋعا جانە قۋعىن-سۇرگىن قۇرباندارىن اقتاۋعا قاتىستى جۇمىس جۇرگىزىلىپ جاتىر. مەملەكەت باسشىسىنا ءارتۇرلى قۋعىن-سۇرگىن ساناتتارى بويىنشا قۇجاتتار مەن ماتەريالدار نەگىزىندە قۇراستىرىلعان 31 تومدىق قۇجات تانىستىرىلدى.
بيىل دا مەملەكەتتىك كوميسسيا قۋعىن-سۇرگىن قۇرباندارىنىڭ تاريحىن زەرتتەۋ, ارحيۆ قۇجاتتارىن تسيفرلاندىرۋ جانە ەلەكتروندى قورلاردى قالىپتاستىرۋ باعىتىنداعى جۇمىسىن جالعاستىرا بەرەدى.