يندۋستريا جانە ينفراقۇرىلىمدىق دامۋ مينيسترلىگى ماشينا جاساۋ سالاسىن دامىتۋ بويىنشا كەشەندى جوسپار ازىرلەيدى, دەپ حابارلايدى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.
وسىعان بايلانىستى يندۋستريالىق دامۋ كوميتەتىنىڭ توراعاسى ءىلياس وسپانوۆ ماشينا جاساۋ كاسىپورىندارىنىڭ وكىلدەرىمەن ونلاين فورماتتا جيىن وتكىزىپ, قۇجاتتى دايىنداۋ جۇمىستارىنا بەلسەندى قاتىسۋعا شاقىردى.
«كەشەندى جوسپاردى ازىرلەۋ شەڭبەرىندە سالانىڭ قازىرگى جاي-كۇيىنە تالداۋ جۇرگىزىلىپ, تۇيتكىلدى ماسەلەلەردى انىقتاۋ جانە ونى شەشۋ جولدارىن تابۋ قاراستىرىلعان. سونىمەن قاتار 2030 جىلعا دەيىن سالانى كەزەڭ-كەزەڭىمەن رەفورمالاۋ جانە كەشەندى دامىتۋدىڭ نەگىزگى تاسىلدەرىنە نازار اۋدارۋ قاجەت», دەپ اتاپ ءوتتى ءىلياس وسپانوۆ.
ەلەكتروتەحنيكالىق جانە اۋىر ماشينا جاساۋ باسقارماسىنىڭ باسشىسى ازامات احمەتوۆتىڭ ايتۋىنشا, ماشينا جاساۋ سالاسىن قولداۋ مەن دامىتۋعا باعىتتالعان جۇيەلى شارالار ازىرلەنەدى.
«كەشەندى جوسپاردىڭ نەگىزگى ماقساتى - ناقتى ءوندىرىس كولەمىن ۇلعايتۋ, ءونىمنىڭ جاڭا تۇرلەرىن ءوندىرۋ, ەكسپورتتى ارتتىرۋ جانە ماشينا جاساۋ سالاسىنداعى دايىن ءونىم يمپورتىن ازايتۋ», دەدى ا. احمەتوۆ.
ءوز كەزەگىندە قۇجاتتى ازىرلەۋشىلەر توبى الداعى ۋاقىتتا بارلىق كاسىپورىنمەن نەگىزگى ماسەلەلەردى تالقىلايدى.