«AMANAT» پارتياسىنىڭ توراعاسى ەرلان قوشانوۆتىڭ قاۋلىسىمەن پارتيانىڭ اتقارۋشى حاتشىسى بولىپ ەلنۇر سابىرجان ۇلى بەيسەنباەۆ تاعايىندالدى, دەپ حابارلايدى Egemen.kz.
ەلنۇر سابىرجان ۇلى 1986 جىلى 27 ماۋسىمدا سول كەزدەگى وڭتۇستىك قازاقستان وبلىسىنىڭ كەنتاۋ قالاسىندا دۇنيەگە كەلگەن.
ءال-فارابي اتىنداعى قازاق ۇلتتىق ۋنيۆەرسيتەتىنىڭ تۇلەگى. ساياساتتانۋشى, الەۋمەتتىك عىلىمدار ماگيسترى.
2008 جىلى ءال-فارابي اتىنداعى قازۇۋ-دىڭ فيلوسوفيا جانە ساياساتتانۋ فاكۋلتەتىن ءبىتىردى.
ەڭبەك جولىن «جاستار ءۇنى» جاستار قوعامدىق ۇيىمىندا مامان رەتىندە باستاپ, 2009 جىلى وسى ۇيىمعا توراعا بولىپ تاعايىندالعان.
2012-2015 جىلدارى تاريح ءپانىنىڭ مۇعالىمى, قازاقستان كوممۋنيستىك حالىق پارتياسىنىڭ الماتى قالالىق فيليالىندا يدەولوگيا جانە ناسيحات جونىندەگى حاتشى قىزمەتتەرىن قوسا اتقاردى.
2016 جىلدان 2017 جىلعا دەيىن الماتى قالاسى اكىمدىگىنىڭ جاستار جوبالارى جانە ۇيىمداستىرۋ جۇمىستارى ءبولىمىنىڭ باسشىسى, جاستار ساياساتى ماسەلەلەرى باسقارماسىنىڭ باسشىسى لاۋازىمدارىندا ەڭبەك ەتتى.
2017 جىلدان 2018 جىلعا دەيىن اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە تاربيە جۇمىسى دەپارتامەنتىنىڭ ديرەكتورى بولىپ جۇمىس اتقاردى.
2019 جىلى نۇر-سۇلتان قالاسى اكىمىنىڭ الەۋمەتتىك ماسەلەلەر جونىندەگى كەڭەسشىسى بولدى.
2020 جىلى «Nur Otan» پارتياسى جانىنداعى «Jas Otan» جاستار قاناتىنىڭ توراعاسى بولىپ سايلاندى.