استانا قالاسىنىڭ اكىمى جەڭىس قاسىمبەك Instagram پاراقشاسىندا بيىلعى وقۋ جىلىندا 9 مەكتەپ قولدانىسقا بەرىلەتىنىن ايتتى, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
«وقۋ ورىندارىنىڭ قۇرىلىس بارىسىمەن تانىستىم. بيىلعى وقۋ جىلىندا تاعى 9 مەكتەپتى قولدانىسقا بەرەمىز. ماسەلەن بۇل رىسقۇلوۆ كوشەسىندەگى, ر.قوشقارباەۆ داڭعىلىنداعى, ۇلى دالا داڭعىلى مەن ساۋران كوشەسىنىڭ قيىلىسىنداعى, ۇلى دالا داڭعىلى مەن №39 كوشەنىڭ قيىلىسىنداعى جانە ت.ب. مەكتەپتەر. كوكتەمدە ىرگەلەس اۋماقتى اباتتاندىرۋعا كىرىسۋدى تاپسىردىم», دەپ جازدى ج.قاسىمبەك.
اكىمنىڭ ايتۋىنشا, الداعى وقۋ جىلىندا تاعى 13 مەكتەپ سالىنادى. مۇنداي مەكتەپتىڭ ارقايسىسى 4 مىڭ وقۋشى ورنىن (2 اۋىسىمدا) اشۋعا مۇمكىندىك بەرەدى. وسىلايشا وقۋشى ورىندارىنا دەگەن قاجەتتىلىك ماسەلەسى ەداۋىر شەشىلەدى.
سول سياقتى مەملەكەت باسشىسىنىڭ تاپسىرماسى بويىنشا «جايلى مەكتەپ» ۇلتتىق جوباسى اياسىندا 100 مىڭ وقۋشى ورنىنا (2 اۋىسىمدا) ارنالعان جاڭا فورماتتاعى 25 مەكتەپتى جوبالاۋ جۇمىسى جۇرگىزىلەدى. جاڭا فورماتتاعى مەكتەپتەردىڭ قۇرىلىسى 2023 جىلى باستالادى.
«بالاباقشا ماسەلەسىنە دە كوڭىل بولەمىز: جاقىندا ەسىل اۋدانىندا (كۇلتەگىن كوشەسى) مەملەكەتتىك بالاباقشا اشىلدى. سول سياقتى كەلەر جىلى جەكە بالاباقشالارعا 9 مىڭ ورىنعا ارنالعان قوسىمشا مەملەكەتتىك تاپسىرىس ورنالاستىرۋدى جوسپارلاپ وتىرمىز, وسى ارقىلى بالالاردى مەكتەپكە دەيىنگى بىلىممەن قامتۋ كولەمىن ارتتىرامىز», دەپ جازدى ەلوردا اكىمى.