پرەزيدەنت جانىنداعى ورتالىق كوممۋنيكاتسيالار قىزمەتىندە يدم اۆتوموبيل جولدارى كوميتەتى توراعاسى, «جول اكتيۆتەرىنىڭ ۇلتتىق ساپا ورتالىعى» رمك باس ديرەكتورى جانە «قازاۆتوجول» ۇك اق باسقارما توراعاسىنىڭ قاتىسۋىمەن بريفينگ ءوتتى, دەپ حابارلايدى Egemen.kz.
جول اكتيۆتەرىنىڭ ۇلتتىق ساپا ورتالىعىنىڭ باس ديرەكتورى زامير ساعىنوۆ كاسىپورىننىڭ جۇمىسى تۋرالى ايتىپ بەردى. وسى جىلى ساپا ورتالىعى جول-قۇرىلىس ماتەريالدارىنىڭ 29 مىڭ ۇلگىسىنەن سىناما العان. ولاردىڭ 9 مىڭى رەسپۋبليكالىق جەلى بويىنشا بولسا, 20 مىڭ سىناما جەرگىلىكتى جەلىگە تيەسىلى. سونىڭ ىشىندە 7,3 مىڭ ماتەريال سىناماسى نەمەسە 24% بەلگىلەنگەن نورماتيۆتىك تالاپتارعا سايكەس كەلمەيدى. وسىلايشا رەسپۋبليكالىق جەلى بويىنشا 13% (1 166), جەرگىلىكتى جەلى بويىنشا 30% (6 234) سايكەسسىزدىك انىقتالدى.
تەحنيكالىق قاداعالاۋدا ورىن العان تالاپ بۇزۋشىلىق فاكتىلەرى بويىنشا وڭىرلىك مەملەكەتتىك ساۋلەت قۇرىلىسى باسقارمالارىنا وتىنىشتەر جولدانۋدا. 2020 جىلدان بەرى ساپا ورتالىعىنىڭ جولداعان وتىنىشتەرى بويىنشا 81 تەحنيكالىق قاداعالاۋ قىزمەتى اكىمشىلىك جاۋاپكەرشىلىككە تارتىلسا, 56 ينجەنەرلەردىڭ اتتەستاتى ءوز كۇشىن جويعان. سونداي-اق 4 مەردىگەر ۇيىم جول قۇرىلىس جۇمىستارىن جۇرگىزۋ ليتسەنزياسىنان ايىرىلعان (2020 ج. – 2, 2022 ج. – 2). جالپى سالىنعان ايىپپۇل سوماسى - 110 ميلليون تەڭگە.