ۇكىمەت وتىرىسىندا دەنساۋلىق ساقتاۋ ءمينيسترى اجار عينيات وڭىرلەردە «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسىن ىسكە اسىرۋ بارىسىن ايتتى, دەپ حابارلايدى Egemen.kz.
«وڭىرلەرمەن جەر تەلىمدەرىن ءبولۋ بويىنشا جۇمىس جۇرگىزدىك. قازىر 14 وڭىردە بۇل جۇمىس اياقتالدى. ەكىنشىدەن, بولىنگەن جەر ۋچاسكەلەرىندە ينجەنەرلىك جەلىلەردى جۇرگىزۋ قاجەت, ول ءۇشىن جەرگىلىكتى بيۋدجەتتەن قاراجات بولىنەدى. اكىمدىكتەر بۇل باعىتتا جۇمىس جۇرگىزىپ جاتىر. اتالعان جوبادا تەلەمەديتسينانى دامىتۋ قاراستىرىلعان, بۇل ءۇشىن ينتەرنەت قاجەت. جەرگىلىكتى بيۋدجەتتەردە قاراجات قاراستىرىلعان, جەرگىلىكتى اتقارۋشى ورگاندارعا ءتيىستى حاتتار جولداندى», دەدى اجار عينيات بۇگىنگى ۇكىمەت وتىرىسىندا.
ۇكىمەت باسشىسى ءاليحان سمايىلوۆ اۋىلدىق دەنساۋلىق ساقتاۋدى جاڭعىرتۋ جونىندەگى ۇلتتىق جوبا اۋىلداردا مەديتسينالىق قىزمەت كورسەتۋ ساپاسىن ارتتىرۋ ءۇشىن ازىرلەنگەنىن ەسكە سالدى. ول ءۇشىن بارلىق ينفراقۇرىلىمدى جاڭعىرتۋ قاجەت.
«جوبا اياسىندا 655 العاشقى مەديتسينالىق-سانيتارلىق كومەك نىسانى سالىنىپ, قايتا جاڭعىرتىلادى. سونداي-اق جۇمىس ىستەپ تۇرعان 12 اۋرۋحانا جوندەۋ جۇمىستارىنان وتكىزىلىپ, 20 جاڭا اۋداندىق اۋرۋحانا اشىلادى. «اۋىل – ەل بەسىگى» سياقتى باسقا جوبالار شەڭبەرىندە مەديتسينالىق وبەكتىلەر سالىنادى. اۋىل تۇرعىندارى ءۇشىن بارلىعى 700-گە جۋىق مەديتسينالىق نىسان اشىلادى. ول ءۇشىن جەرگىلىكتى اتقارۋشى ورگاندار جەر ۋچاسكەلەرىن جەدەل قامتاماسىز ەتىپ, ينجەنەرلىك كوممۋنيكاتسيالار جۇرگىزۋ ماسەلەلەرىن ويلاستىرۋى قاجەت», دەدى ءاليحان سمايىلوۆ.