استانا اۋەجايىنان شەتەلگە ۇشاتىن جولاۋشىلاردى تىركەۋ بۇدان بىلاي اۋە كەمەسى ۇشقانعا دەيىن ەكى ساعات بۇرىن باستالادى, دەپ حابارلايدى Egemen.kz «نۇرسۇلتان نازارباەۆ حالىقارالىق اۋەجايىنىڭ» ءباسپاسوز قىزمەتىنە سىلتەمە جاساپ.
«قازاقستان اۋەجايلارىندا جولاۋشىلارعا قىزمەت كورسەتۋدى ۇيىمداستىرۋ قاعيدالارىنىڭ 6-تارماعىنا سايكەس, ۇشاتىن جولاۋشىلاردى تىركەۋ بۇدان بىلاي حالىقارالىق رەيستەردە اۋە كەمەسى ۇشقانعا دەيىن (اۋە كەمەسىنە جانە جولاۋشىلار سانىنا بايلانىستى) ەكى ساعات بۇرىن باستالادى. بۇرىن تىركەۋ ۇشۋدان ءۇش ساعات بۇرىن باستالاتىن», دەلىنگەن حابارلامادا.
ال ىشكى باعىتتار بويىنشا رەيستەرگە ۇشۋدى تىركەۋ ۋاقىتى وزگەرىسسىز قالادى, ياعني تىركەۋ 1,5 ساعات بۇرىن باستالادى.