جەكە پاندەر بويىنشا وقۋ باعدارلامالارىن جەتىلدىرۋ قاجەت. بۇل تۋرالى وقۋ-اعارتۋ ءمينيسترى اسحات ايماعامبەتوۆ ۇكىمەت وتىرىسىندا ايتتى, دەپ حابارلايدى Egemen.kz.
«ورتا ءبىلىم بەرۋدىڭ وزەكتى ماسەلەسى – ءبىلىم مازمۇنى مەن ساپاسى. ورتا ءبىلىم بەرۋدە 2016-2021 جىلدار ارالىعىندا بارلىق مەكتەپتەر جاڭارتىلعان مازمۇنعا كوشتى. كريتەريالدى باعالاۋ جۇيەسى ەنگىزىلدى. سونىمەن قاتار مونيتورينگتىك زەرتتەۋلەر جەكەلەگەن پاندەر بويىنشا وقۋ باعدارلامالارىن جەتىلدىرۋدى قاجەت ەتەتىنىن كورسەتتى. بۇگىنگى تاڭدا جۇمىس توپتارى قۇرىلىپ, جاڭا مەملەكەتتىك ستاندارت پەن وقىتۋ باعدارلامالارى دايىندالۋدا», دەدى اسحات ايماعامبەتوۆ.
ءمينيستردىڭ ايتۋىنشا, اكادەميالىق اۆتونوميا مەكتەپتەرگە كەزەڭ-كەزەڭىمەن ەنگىزىلەدى.
«مەكتەپتى اتتەستاتتاۋ جۇيەسى رەپرەسسيالىق مازمۇننان دياگنوستيكالىق باعىتقا كوشەدى. مەكتەپتەردەگى قورىتىندى اتتەستاتتاۋدىڭ ناتيجەلەرىن حالىقارالىق دەڭگەيدە تانۋ جۇمىستارى جۇرگىزىلەدى», دەدى مينيستر.
سونداي-اق ول بالالاردى ۇيىرمەگە تارتۋ ءبىلىم سالاسى ءۇشىن ماڭىزدى ەكەنىن اتاپ ءوتتى.
«وقۋشىلار سارايى, جاس تەحنيكتەر ستانتسيالارى, مۋزىكا جانە ونەر مەكتەپتەرى, بالالار تەحنوپاركتەرى اشىلادى. ءبىلىم بەرۋ ۇيىمدارىندا پىكىرتالاس قوزعالىسى, مەكتەپ جانە وقۋشىلاردىڭ ءوزىن-ءوزى باسقارۋى بەلسەندى تۇردە دامىپ كەلەدى. بۇل بالالاردىڭ سىني جانە اناليتيكالىق ويلاۋ قابىلەتىن دامىتۋعا مۇمكىندىك بەرەدى. ءبىز بارلىق مەكتەپتەردە دەبات قوزعالىسى مەن مەكتەپ پارلامەنتتەرىن دامىتامىز», دەپ قوستى ا. ايماعامبەتوۆ.
ول وقۋ ورىندارىندا شاحمات ويىندارىن دامىتۋعا قولداۋ كورسەتىلەتىنىن ايتتى.
«مەكتەپتەردەگى شاحمات سەكتسيالارىنا 200 مىڭنان استام بالا تارتىلعان. فەدەراتسيا بۇل باعىتتا, ياعني وقۋ-ادىستەمەلىك كەشەندەردى دايىنداۋ جانە جاتتىقتىرۋشىلار مەن مۇعالىمدەردىڭ بىلىكتىلىگىن ارتتىرۋ جۇمىستارىن جۇرگىزەدى», دەدى ا. ايماعامبەتوۆ.