قازاقستان پارلامەنتى سەناتىنىڭ توراعاسى ماۋلەن اشىمباەۆ وزبەكستاننىڭ سامارقاند قالاسىندا ءوتىپ جاتقان تمد پارلامەنتارالىق اسسامبلەياسىنىڭ 54-ءشى پلەنارلىق وتىرىسىنا قاتىستى, دەپ حابارلايدى Egemen.kz.
سەنات سپيكەرى ءىس-شارالاردى جوعارى دەڭگەيدە ۇيىمداستىرعانى ءۇشىن وزبەك تاراپى مەن تمد پاا-عا العىس ايتتى.
سونداي-اق ماۋلەن اشىمباەۆ پارلامەنتارالىق اسسامبلەيا الاڭىندا ساياسي ديالوگتى نىعايتۋعا, ساۋدا-ەكونوميكالىق قاتىناستاردى دامىتۋعا جانە ەلدەرىمىز اراسىنداعى مادەني-گۋمانيتارلىق بايلانىستاردى ارتتىرۋعا قاتىستى وزەكتى ماسەلەلەر قارالاتىنىن اتاپ ءوتتى.
«بۇگىنگى الەمدىك سىن-قاتەرلەرگە بىرلەسىپ قارسى تۇرۋ ماسەلەسى تابىستى تالقىلانىپ جاتىر. ونىڭ ءبارى سىندارلى, سەنىمدى جانە ەلدەرىمىزدىڭ ۇلتتىق مۇددەلەرىن قۇرمەتتەي وتىرىپ قارالادى. پارلامەنتارالىق اسسامبلەيا تمد كەڭىستىگىندە جان-جاقتى ىنتىماقتاستىق پەن ديالوگتى نىعايتۋدىڭ ماڭىزدى فاكتورى. الداعى ۋاقىتتا اسسامبلەيانى ودان ءارى دامىتۋ – ءبىزدىڭ ورتاق مىندەتىمىز», دەدى سەنات توراعاسى.
سەنات سپيكەرى مەملەكەت باسشىسى قاسىم-جومارت توقاەۆتىڭ باستاماسىمەن قازاقستاندا جۇرگىزىلىپ جاتقان قوعامدىق-ساياسي وزگەرىستەرگە دە توقتالىپ ءوتتى.
«كەلەسى اپتادا قازاقستان پارلامەنتىنىڭ سەناتى جاڭارتىلعان كونستيتۋتسيانى ىسكە اسىرۋعا ارنالعان كونستيتۋتسيالىق زاڭدار توپتاماسىن قارايدى. قازاقستاندا جۇرگىزىلىپ جاتقان رەفورمالاردىڭ نەگىزگى ماقساتى – ادام قۇقىقتارىن قورعاۋدى نىعايتۋ جانە بيلىك تارماقتارى, ورتالىق پەن وڭىرلەر اراسىندا وكىلەتتىكتەر مەن جاۋاپكەرشىلىكتىڭ تەڭگەرىمىن قامتاماسىز ەتۋ. ىسكە اسىرىلىپ جاتقان بارلىق رەفورما ءبىزدىڭ ەلىمىزدە ازاماتتارىمىزدىڭ سۇرانىستارى مەن مۇددەلەرىن ەسكەرەتىن جاڭا ساياسي مودەل قالىپتاستىرۋدى كوزدەيدى», دەدى ماۋلەن اشىمباەۆ.
سەنات توراعاسى ساياسي جانە ەكونوميكالىق رەفورمالاردى زاڭنامالىق تۇرعىدان قامتاماسىز ەتۋ قازاقستان پارلامەنتى سەناتىنىڭ قازىرگى كەزەڭدەگى نەگىزگى باسىمدىعى ەكەنىن اتاپ ءوتتى. تمد پاا-نىڭ پلەنارلىق وتىرىسىنا قاتىسۋشىلار قازاقستاندا جۇرگىزىلىپ جاتقان رەفورمالارعا ايرىقشا توقتالىپ, ءبىزدىڭ ەلدىڭ سەرپىندى دامۋى بۇكىل ءوڭىردىڭ ودان ءارى وركەندەۋى ءۇشىن زور ماڭىزعا يە ەكەنىن تىلگە تيەك ەتتى.
سونىمەن قاتار ماۋلەن اشىمباەۆ تمد پاا الاڭىندا مۇشە ەلدەردىڭ پارلامەنتتەرى پالاتالارىنىڭ باسشىلارىمەن بىرقاتار ەكىجاقتى كەزدەسۋلەر وتكىزدى.
وزبەكستان پارلامەنتى سەناتىنىڭ ءتورايىمى تانزيلا نارباەۆامەن كەزدەسۋدە ماۋلەن اشىمباەۆ وزبەك ۆەكتورى قازاقستان رەسپۋبليكاسىنىڭ سىرتقى ساياساتتاعى نەگىزگى باسىمدىقتارىنىڭ ءبىرى بولىپ قالا بەرەتىنىن ايتتى. سونداي-اق تاراپتار ەكى ەلدىڭ پارلامەنتارالىق ىنتىماقتاستىعىن نىعايتۋ ماسەلەلەرىن تالقىلادى.
قىرعىزستان جوگوركۋ كەنەشىنىڭ توراعاسى نۇرلانبەك شاكيەۆپەن اڭگىمەلەسۋ بارىسىندا ەكونوميكالىق, مادەني-گۋمانيتارلىق جانە باسقا دا سالالارداعى بىرلەسكەن جوبالاردى جۇزەگە اسىرۋ ماسەلەلەرى ءسوز بولىپ, وعان دەپۋتاتتاردىڭ قاتىسۋ مۇمكىندىگى قارالدى. كەلەسى جىلى تاۋەلسىز مەملەكەتتەر دوستاستىعىنا توراعالىق قازاقستاننان قىرعىزستانعا وتەدى. وسىعان بايلانىستى ماۋلەن اشىمباەۆ باۋىرلاس ەلدىڭ باسشىلىعىنا اتالعان حالىقارالىق ۇيىمعا تابىستى جانە جەمىستى توراعالىق ەتۋگە تىلەكتەستىگىن جەتكىزدى.
ماۋلەن اشىمباەۆ پەن تاجىكستاننىڭ ولي ءمادجليسى نامويانداگون ءمادجليسىنىڭ توراعاسى ماحمادتوير زوكيرزودا اراسىنداعى كەزدەسۋدە قازاقستان مەن تاجىكستان پارلامەنتشىلەرىنىڭ ىنتىماقتاستىعىن ودان ءارى ارتتىرۋ پەرسپەكتيۆالارى اڭگىمەگە ارقاۋ بولدى. قازاقستان پارلامەنتى سەناتىنىڭ سپيكەرى ارىپتەستەرىن ناقتىلىق پەن پراكتيكالىق مازمۇنعا باسا ءمان بەرە وتىرىپ, ءوزارا ءىس-قيمىلدى كۇشەيتۋ باعىتىندا بىرلەسىپ جۇمىس ىستەۋگە شاقىردى.
اتالعان كەزدەسۋلەردە كەلەسى جىلى ورتالىق ازيا ەلدەرىنىڭ ءبىرىنشى پارلامەنتارالىق فورۋمىن وتكىزۋ ماسەلەسى دە تالقىلاندى. بۇل باستامانى جۇزەگە اسىرۋ تۋرالى ۋاعدالاستىققا بيىل قىرعىزستاننىڭ چولپون-اتا قالاسىندا وتكەن ورتالىق ازيا مەملەكەتتەرى باسشىلارىنىڭ كونسۋلتاتيۆتىك كەزدەسۋىندە قول جەتكىزىلدى. ماۋلەن اشىمباەۆتىڭ ايتۋىنشا, فورۋمدى وتكىزۋ ورتالىق ازيا ەلدەرىنىڭ ەلەۋلى ساياسي, ەكونوميكالىق جانە مادەني الەۋەتىن ىسكە اسىرۋعا ىقپال ەتەدى.
رەسەي فەدەرالدى جينالىسى فەدەراتسيا كەڭەسىنىڭ ءتورايىمى ۆالەنتينا ماتۆيەنكومەن كەزدەسۋدە پارلامەنتشىلەردىڭ وڭىرارالىق جانە گۋمانيتارلىق ىنتىماقتاستىقتى نىعايتۋ جونىندەگى ءوزارا ءىس-ارەكەتتەرى قوزعالدى.