سەناتورلار ءماسليحات دەپۋتاتتارىمەن كەزدەسۋ وتكىزدى

ونلاين-وتىرىستىڭ نەگىزگى تاقىرىبى مەملەكەت باسشىسى قاسىم-جومارت توقاەۆتىڭ «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى قازاقستان حالقىنا جولداۋىندا بەلگىلەنگەن دەنساۋلىق ساقتاۋ جانە ءبىلىم بەرۋ ماسەلەلەرى بولدى.

كەزدەسۋ بارىسىندا وبلىستاردان, رەسپۋبليكالىق ماڭىزى بار قالالار مەن استانادان وكىلدەرى سايلاناتىن پالاتا رەتىندە سەناتتىڭ نەگىزگى مىندەتتەرىنىڭ ءبىرى – وڭىرلەردىڭ دامۋىنا بەلسەندى جاردەمدەسۋ ەكەندىگى اتاپ ءوتىلدى. وسىعان بايلانىستى وڭىرلەردەگى پروبلەمالاردى, ونىڭ ىشىندە ءبىلىم بەرۋ جانە دەنساۋلىق ساقتاۋ سالالارىنداعى ماسەلەلەردى شەشۋ جۇمىسىنداعى ماڭىزدى قۇرالداردىڭ ءبىرى – سەناتورلاردىڭ ءماسليحات دەپۋتاتتارىمەن ءوزارا تىعىز ءىس-قيمىلى بولىپ تابىلادى.

«بۇل سالالارداعى كەيبىر وزەكتى ماسەلەلەر ءوز شەشىمىن تاپپايتىنى جاسىرىن ەمەس. مىسالى, ەلىمىزدىڭ دەنساۋلىق ساقتاۋ سالاسىندا حالىقتى العاشقى مەديتسينالىق-سانيتارلىق كومەكپەن قامتۋ دەڭگەيىنىڭ تومەندىگى, الەۋمەتتىك مارتەبەسى بەلگىلەنبەگەن كونتينگەنتتى الەۋمەتتىك مەديتسينالىق ساقتاندىرۋمەن قامتۋ, مەديتسينالىق قىزمەتتەرگە تاريفتەردى قالىپتاستىرۋ, جەرگىلىكتى جەرلەردە نەسيە بەرەشەگىنىڭ بولۋى, نەگىزگى كاپيتالعا جۇمسالاتىن شىعىنداردىڭ ازدىعى, جۇيەنى تسيفرلاندىرۋدىڭ تومەندىگى, ءدارى-دارمەكپەن قامتاماسىز ەتۋدەگى الشاقتىق, مامانداردىڭ جەتىسپەۋشىلىگى جانە ولاردىڭ بىلىكتىلىگىنىڭ تومەندىگى جانە ت. ب. ءبىزدىڭ كوميتەت وسى ماسەلەلەردى ءوز باقىلاۋىندا ۇستاۋدى جالعاستىرا بەرەدى», دەدى ناريمان تورەعاليەۆ.

كەزدەسۋگە دەنساۋلىق ساقتاۋ, ۇلتتىق ەكونوميكا, قارجى مينيسترلىكتەرىنىڭ, الەۋمەتتىك مەديتسينالىق ساقتاندىرۋ قورىنىڭ وكىلدەرى, «قازاقستان ءماسليحاتتارى دەپۋتاتتارىنىڭ بىرلەستىگىنىڭ» باسشىلىعى, سونداي-اق رەسپۋبليكالىق ماڭىزى بار قالالار مەن اۋداندارداعى قوعامدىق كەڭەستەردىڭ توراعالارى قاتىستى.

سەناتورلار «قولجەتىمدى جانە ءتيىمدى دەنساۋلىق ساقتاۋ جۇيەسى» تاقىرىبى بويىنشا وتەتىن ۇكىمەت ساعاتىنا دايىندىق اياسىندا كەزدەسۋ بارىسىندا كوتەرىلگەن بارلىق ماسەلەلەردى پىسىقتايتىن بولدى جانە بۇدان بىلايعى زاڭ شىعارۋ قىزمەتىندە پايدالانىلادى.