بەلارۋس قاقپاسىنا جەڭىس گولىن سوعا الامىز با؟

قازاقستان مەن بەلارۋس قۇرامالا­رىنىڭ تانىستىعى 2009 جىلى باستالدى. سول جىلى ەۋروپا چەمپيوناتىنىڭ ىرىكتەۋ كەزەڭىندە ءبىر توپتا ونەر كورسەتىپ, ەكى ماتچتا دا قارسىلاستار باسىم ءتۇستى. 1 ساۋىردە استانادا وتكەن كەزدەسۋدە 1:5 ەسەبى تىركەلسە, قىركۇيەكتەگى قارىمتا ويىندا الاڭ يەلەرى 4:0 ەسەبىمەن جەڭىسكە جەتتى. كەيىننەن اراعا 11 جىل سالىپ ەكى ەلدىڭ فۋتبولشىلارى ۇلتتار ليگاسى تۋرنيرىندە قايتا جولىقتى. وكىنىشكە قاراي, بۇل كەزدەسۋلەردە دە بەلارۋس قۇراماسىنا شامامىز جەتپەدى. الماتىداعى باسەكەدە 1:2 ەسەبىمەن جول بەرسەك, قارىمتا ويىندا 2:0 ناتيجەسىمەن جەڭىلدىك.

كەشە ەكى ەلدىڭ باس باپكەرلەرى ويىن الدىنداعى ءباسپاسوز ءماسليحاتىن وتكىزدى. بەلارۋس قۇراماسىنىڭ باس باپكەرى گەور­گي كوندراتەۆ ءوز كومانداسىنىڭ جەڭىسىنە سەنىمدى.

«شاكىرتتەرىم قازاقستانعا جوعارى دايىندىقپەن كەلدى. ءبىزدىڭ قۇرامادا قازاقستاندىق فۋتبولشىلاردى, قازاقستان بىرىنشىلىگىن جاقسى بىلەتىن ەبونگ, يۋدەن­كو جانە پولياكوۆ سەكىلدى ويىنشىلار بار. ولار بۇگىنگى ويىندا ماڭىزدى ءرول اتقا­رادى دەپ ويلايمىن. سەربيادا وتكەن ەكى قۇراما اراسىنداعى سوڭعى ويىندا ءبىز بارلىق كورسەتكىش بويىنشا قازاقتاردان الدا بولدىق. سوققى باعىتتاۋ, بۇرىش­تاما­لار ورىنداۋ, دوپقا يەلىك ەتۋ, بارلىق جاعىنان باسىم تۇستىك. بۇل جولى دا شابۋىلدا وينايمىز, ءبىزدىڭ كوماندانىڭ جەڭەتىندەي شاماسى بار», دەيدى ول.

ال قازاقستان ۇلتتىق قۇراماسىنىڭ قاقپاشىسى يگور شاتسكي بەلارۋس قۇرا­ماسىن جەڭىپ, بارلىق ماسەلەگە نۇكتە قويۋعا تىرىسامىز دەيدى. «ەلورداداعى وقۋ-جاتتىعۋ جيىنى جوسپارلى تۇردە ءجۇرىپ جاتىر. ونى جاتتىقتىرۋشىلار قۇرامى وتە جاقسى ويلاستىرعان. جىگىت­تەردىڭ دايىندىعى دا, ماتچقا دەگەن كوڭىل كۇيلەرى دە وتە جوعارى. بەلارۋس قۇ­راماسىن وسى جولى جەڭۋگە تىرىسامىز. ارينە, ماتچتىڭ وڭايعا سوقپايتىنى بەل­گىلى, بىراق وسى كەزدەسۋدە بارلىق ماسەلەگە نۇكتە قويۋعا ۇمتىلامىز», دەيدى قاقپاشى.

ايتا كەتەيىك, بەلارۋس پەن قازاقستان قۇرامالارى اراسىنداعى العاشقى ويىن سەربيادا ءوتىپ, كەزدەسۋ 1:1 ەسەبىمەن تەڭ اياقتالعان بولاتىن. ءبىرىنشى تايمدا قازاق­ستان قۇراماسى ەسەپتە الدا بولعا­نى­مەن, كەزدەسۋدىڭ سوڭعى مينۋتتارىندا گول وتكىزىپ, جەڭىستى ۋىسىندا ساقتاي المادى.