ەلوردادا شاحماتتان ايەلدەر اراسىنداعى 2022/23 جىلعى گران-پري جارىسىنىڭ ءبىرىنشى كەزەڭى باستالدى. 30 قىركۇيەككە دەيىن جالعاساتىن حالىقارالىق تۋرنيردە الەمنىڭ ەڭ ۇزدىك دەگەن 12 سپورتشىسى باق سىناپ جاتىر.
ءوز ەلىمىزدە ۇيىمداستىرىلىپ جاتقان Women Grand Prix 2022 تۋرنيرىنە قازاقستان قۇراماسى ساپىنان بىلتىرعى جىلدام شاحماتتان (بليتس) الەم چەمپيوناتىنىڭ جەڭىمپازى ءبيبىسارا اساۋباەۆا مەن تالاي باسەكەدە توپ جارعان حالىقارالىق دارەجەدەگى گروسسمەيستەر جانسايا ابدىمالىك قاتىسىپ, ەل نامىسىن قورعاۋدا.
ءتۋرنيردىڭ جالپى جۇلدە قورى 200 ميلليون تەڭگەنى قۇرايدى. ءبىرىنشى ورىنعا يە بولعان شاحماتشىعا 15 مىڭ ەۋرو مەن 160 ۇپاي بەرىلەدى. ال ەكىنشى ورىن العان سپورتشى 12 مىڭ ەۋرو مەن 130 رەيتينگتىك ۇپايعا قول جەتكىزسە, ءۇشىنشى ورىنعا يە بولعان سپورتشى 10 مىڭ ەۋرو مەن 110 ۇپايعا يەلىك ەتەدى.