قۇرلىقتىق حوككەي ليگاسىندا (قحل) باق سىنايتىن ەلوردانىڭ «بارىسى» تۇراقتى ليگانىڭ كەزەكتى تۋر ويىنىن ومبىنىڭ «اۆانگارد» ۇجىمىمەن وتكىزىپ, 2:5 ەسەبىمەن جەڭىلىپ قالدى.
«بارىس» پەن «اۆانگارد» ەلوردادا ەكى كۇندە ەكى كەزدەسۋ وتكىزدى. «بارىس ارەنا» مۇزايدىنىنداعى ءبىرىنشى ماتچتا اندرەي سكابەلكا شاكىرتتەرى 5:3 ەسەبىمەن جەڭىسكە جەتكەنىمەن, كەيىنگى ويىندا ەسە جىبەرىپ قويدى. قارىمتا كەزدەسۋدىڭ العاشقى كەزەڭىن ءساتتى باستاعان قوناقتار 2:0 ەسەبىمەن العا شىعىپ الدى. دەگەنمەن كەزەڭنىڭ اياقتالۋىنا ەكى مينۋت قالعاندا «بارىس» ساپىنان ەگور پەتۋحوۆ مەرگەندىگىمەن كوزگە ءتۇسىپ, ەسەپ ايىرماسىن قىسقارتتى – 1:2.
ۇزىلىستەن كەيىن دە «اۆانگارد» حوككەيشىلەرى بەلسەندىلىكتەرىن ءبىر ساتكە دە تومەندەتپەي, اندرەي شۋتوۆ قورعاعان قاقپاعا جاۋاپسىز ءتورت شايبا سوقتى. ءۇشىنشى كەزەڭدە ەلوردالىقتاردان ليندەن ۆەي گول سوعىپ, تابلوداعى كورسەتكىشتى 2:5-كە جەتكىزگەنىمەن, ماتچتى جەڭىسپەن تۇيىندەي المادى. كەزدەسۋدىڭ سوڭىنا دەيىن 2:5 ەسەبى ساقتالىپ قالدى. وسىلايشا, ەكى ۇجىم ەكى ويىندا ءبىر-ءبىر جەڭىسكە قول جەتكىزدى.
«شىعىس» كونفەرەنتسياسىنىڭ جەتىنشى تۋر ويىندارىنان كەيىن «بارىس» بەس ۇپايمەن 11 كوماندانىڭ ىشىندە توعىزىنشى ورىندا كەلەدى. ال «اۆانگارد» ءۇش ۇپايمەن 10-ورىنعا كوتەرىلىپ الدى.