كاسىپقوي بوكستىڭ ورتا جانە ەكىنشى ورتا سالماقتاعى تاڭداۋلى بوكسشىلارى قازاقستاندىق گەننادي گولوۆكين (42-2-1, 37 كو) مەن مەكسيكالىق ساۋل الۆارەس (58-2-2, 39 KO) اراسىنداعى ءۇشىنشى ايقاس اقش-تىڭ لاس-ۆەگاس قالاسىندا ءوتىپ, جانكۇيەرلەرگە تارتىستى جەكپە-جەك ۇسىندى. 20 مىڭ جانكۇيەر سىياتىن T-Mobile Arena سپورت كەشەنىندە وتكەن تريلوگيا دا كوپشىلىك كۇتكەندەي 12 راۋندقا جالعاسىپ, مەكسيكالىق بوكسشىنىڭ جەڭىسىمەن اياقتالدى.
«بۇل ءان بۇرىنعى اننەن وزگەرەك» دەگەندەي, بۇل جولعى ايقاس بۇعان دەيىنگى ەكى كەزدەسۋدەن مۇلدە باسقا جاعدايدا ءوتتى. ماسەلەن, 2017 جانە 2018 جىلدارى ۇيىمداستىرىلعان ءبىرىنشى جانە ەكىنشى جەكپە-جەك ورتا سالماقتا ءوتىپ, گولوۆكين رينگكە چەمپيون رەتىندە كوتەرىلگەن بولاتىن. ال «كانەلو» بولسا چەمپيوندىق بەلدىككە ۇمىتكەر بوكسشى رەتىندە شارشى الاڭعا شىققان ەدى. ءتورت جىلدان كەيىن قايتا ۇيىمداستىرىلعان قوس بوكسشىنىڭ ءۇشىنشى كەزدەسۋى ءبىر سالماق جوعارى, ياعني ەكىنشى ورتا سالماقتا ءوتىپ, بۇل جولى ساۋل ەكىنشى ورتا سالماقتىڭ چەمپيونى رەتىندە بەلدىكتەرىن قورعادى.
تاعى ءبىر ەرەكشە توقتالىپ وتەرلىك جايت, مۇحيتتىڭ ارعى بەتىندەگى بوكس كەشىندە ءان الەمىندە دۇنيە جۇزىنە تانىلىپ ۇلگەرگەن قازاقتىڭ ايگىلى ءانشىسى ديماش قۇدايبەرگەن قازاقستاننىڭ ءانۇرانىن شىرقادى.
جەكپە-جەك الدىنداعى رەسمي ءىس-شارالار اياقتالعان سوڭ, ەكىنشى ورتا سالماقتىڭ «كورولىن» انىقتايتىن جەكپە-جەك تە باستالىپ كەتتى. العاشقى راۋندتا بوكسشىلار ادەتتەگىدەي ءبىر-ءبىرىن اڭدىسۋىمەن, كەزدەسۋگە قانداي دايىندىقپەن, قانداي تاكتيكامەن كەلگەنىن بارلاۋمەن بولدى. باسقا-باسقا, گولوۆكين مەن «كانەلو» ءبىر-ءبىرىنىڭ قارىم-قابىلەتىن, قانداي مۇمكىندىككە يە ەكەندىكتەرىن وتە جاقسى بىلەدى. بۇعان دەيىنگى ەكى كەزدەسۋدەگى 24 راۋندتىق ايقاستى ايتپاعاننىڭ وزىندە, ولار ونىڭ الدىندا تالاي مارتە جاتتىعۋ زالىندا بىرگە دايىندالىپ, سپاررينگ-سەرىكتەس رەتىندە بىرنەشە راۋند جۇدىرىقتاسىپ, ءوزارا شەبەرلىكتەرىن شىڭداعان.
وسىعان دەيىنگى ءبىرىنشى جەكپە-جەكتە گەننادي گولوۆكين, بوكسشىلاردىڭ تىلىمەن ايتقاندا, ء«بىرىنشى نومىرمەن» جۇمىس ىستەسە, كەيىنگىسىندە الۆارەس رينگتىڭ ورتاسىندا بيلىك جۇرگىزۋگە تىرىسقان ەدى. ال بۇل جولى ەكەۋى دە ارتقا شەگىنبەي, شارشى الاڭنىڭ قاق ورتاسىندا قاسقايىپ تۇرىپ ايقاستى.
العاشقى ءۇش راۋند تەڭ جاعدايدا وتكەنىمەن, ءتورتىنشى راۋندتان باستاپ «كانەلو» جىلدامدىعىن ارتتىرىپ, ءدال سوققىلاردى كوبىرەك جۇمساي باستادى. ءتىپتى ول ءار شابۋىلىن كەم دەگەندە ەكى سوققىمەن اياقتاۋعا تىرىسىپ, ۇپاي سانىنا جۇمىس ىستەي باستاعانىن بايقاتتى. ال گولوۆكين بولسا, تەك دجەب سوققىلارىمەن عانا شەكتەلىپ وتىردى. كەلەسى راۋندتا دا مەكسيكالىق بوكسشى شيراق قيمىلداعانىمەن, جانكۇيەرلەر تاڭداي قاعاتىنداي قاۋىپتى سوققى جاساي العان جوق. گولوۆكين قارسىلاستىڭ اشىلۋىن جانە قاتەلەسۋىن كۇتىپ, ءبىراز سوققى جاساي الماي ءجۇردى. سونداي-اق ءدال وسى راۋندتا وتانداسىمىز فيزيكالىق تۇرعىدا شارشاي باستاعان سياقتى كورىنگەن-ءدى. كەيىنگى راۋندتاردا بايقاعانىمىزداي, گولوۆكين شارشاماعان ەكەن. بۇل جاي عانا جەكپە-جەك بارىسىنداعى تاكتيكالىق ويىن ەكەنىن بىلدىك.
سەگىزىنشى راۋندتان كەيىن وتانداسىمىز شارشى الاڭداعى بەلسەندىلىگىن ارتتىرىپ, قارسىلاسىنا بىرنەشە سوققىسىن دارىتا الدى. كەيىنگى راۋندتاردا دا گەننادي تاۋەكەلگە بارىپ, الدىڭعى ەكى جەكپە-جەكتەگىدەي مەكسيكالىقتىڭ ىرقىنا جىعىلىپ, كانات ارقىلى شابۋىلعا كوشتى. ابىروي بولعاندا, قورعانىپ ءجۇرىپ قارسىلاسىن وڭدىرماي ۇراتىن «كانەلو» دا راۋند سوڭىندا شارشاپ, اۋىر سوققى جاساۋعا ءالى كەلمەي قالدى.
سونىمەن 12 راۋندقا جالعاسقان تارتىستى جەكپە-جەكتىڭ تاعدىرىن تورەشىلەر شەشتى. ءبىرىنشى تورەشى ءتورت راۋندتىق باسىمدىقپەن «كانەلو» جەڭىسكە جەتتى دەسە (116-112), قالعان ەكى تورەشى 115-113 ەسەبىمەن مەكسيكالىق بوكسشىنىڭ باسىم بولعانىن ءبىلدىردى. وسىلايشا, ساۋل «كانەلو» الۆارەس تورەشىلەردىڭ ءبىراۋىز شەشىمىمەن ءۇشىنشى جەكپە-جەكتە جەڭىسكە جەتىپ, بەس جىلعا سوزىلعان تريلوگيانىڭ نۇكتەسىن قويدى.
جەكپە-جەك الدىندا كوپشىلىك بوكس مامانى گولوۆكين بۇل كەزدەسۋدە نوكاۋتپەن جەڭىلەدى دەپ بولجام جاساعان ەدى. ويتكەنى وتانداسىمىز وزىنە ۇيرەنشىكتى ورتا سالماقتا ەمەس, باقانداي ءتورت كيلو جوعارى سالماقتا جۇدىرىقتاستى. بوكستا ءبىر كيلو سالماقتىڭ ءوزى ۇلكەن ماڭىزعا يە ەكەنىن ەسكەرسەك, وتانداسىمىز وزىنەن ءبىر ەمەس ءتورت كيلو سالماق جوعارى بوكسشىنىڭ جاعدايىنا ءتۇسىپ, ونىمەن تەڭ دارەجەدە جۇدىرىقتاسقانىنىڭ ءوزىن جەڭىس دەپ ەسەپتەۋگە بولاتىن شىعار.
CompuBox جۇيەسىنىڭ دەرەگىنە سۇيەنەر بولساق, گولوۆكين بۇل جولى دا (ول العاشقى ەكى كەزدەسۋدە دە كوپ سوققى جاساعان) سوققى جاساۋ جاعىنان بەلسەندى بولدى – 521. وكىنىشكە قاراي, ونىڭ تەك 120-سى عانا ءدال تيگەن ەكەن. ال «كانەلونىڭ» سوققىسى كەم شىققان – 487. بىراق سانى از بولعانىمەن, ساپاسى كوپ, ياعني ءدال تيەگەن سوققىلارىنىڭ سانى – 130.
دجەپ سوققىلار سانى بويىنشا دا گەننادي گولوۆكين الدا بولدى – 74-45. ال كۇش سالىپ جاساعان سوققىلار ستاتيستيكاسىندا «كانەلو» ايقىن باسىمدىققا يە بولعان ەكەن. ماسەلەن, گولوۆكين 171 كۇشتى سوققى جاساپ, ونىڭ 46-سىن عانا قارسىلاسىنا دارىتا العان. الۆارەستىڭ 217 جويقىن سوققىسىنىڭ 86-سى ءدوپ تيگەن.
جالپى, گەننادي ءۇش جەكپە-جەكتە دە جانكۇيەرلەر ەسىندە كوپ سوققى جۇمساعان بوكسشى رەتىندە قالادى. ماسەلەن, وتانداسىمىز 2017 جىلعى ءبىرىنشى ايقاستا 703 سوققى جاساعان بولسا, 2018 جىلعى ەكىنشى جەكپە-جەكتە 879 مارتە سوققى باعىتتاعان. دجەب بويىنشا دا دالدىك تانىتقان بولسا, كۇشتىك سوققىدا ءبارىبىر قارسىلاسىنان كەمشىن ءتۇسىپ وتىرعان.
جەكپە-جەكتىڭ قورىتىندىسى گولوۆكين ءۇشىن ءساتتى بولا قويماسا دا, ول رينگتەن وزىنە تيەسىلى ولجامەن كەتتى. وتانداسىمىز 8 ملن دوللاردى جامباسقا باسسا, الۆارەسكە 10 ملن دوللار بۇيىردى. سونداي-اق ەكى بوكسشى جارنامادان, بيلەت ساتىلىمىنان جانە اقىلى ترانسلياتسيادان تۇسكەن تابىستى دا ءوزارا بولىسەدى.