وسىدان تۋرا ءبىر جىل بۇرىن مەملەكەت باسشىسى قاسىم-جومارت توقاەۆتىڭ قاتىسۋىمەن ماڭعىستاۋ وبلىسىنىڭ الەۋمەتتىك-ەكونوميكالىق دامۋى جونىندەگى كەڭەس وتكەن بولاتىن.
سول جولى پرەزيدەنت «قازمۇنايگاز» ۇلتتىق كومپانياسىنا مۇناي كەن ورىندارىنىڭ بىرتە-بىرتە توزۋىنا, 2030 جىلعا قاراي وندىرىلەتىن مۇنايدىڭ ازايۋىنا بايلانىستى وڭىردە گەولوگيالىق-بارلاۋ جۇمىستارىنىڭ جەكە جوسپارىن ازىرلەۋدى تاپسىرعان-دى. وسى تاپسىرما اياسىندا وزەن جانە قاراماندىباس كەن ورىندارىن وڭالتۋ جوسپارىنىڭ تۇجىرىمداماسى دايىندالدى.
وتكەن جۇما كۇنى «قازمۇنايگاز» ۇك» اق باسقارما توراعاسى ماعزۇم مىرزاعاليەۆ, «وزەنمۇنايگاز» اق باس ديرەكتورى ماقسات يباعاروۆ, «قمگ ينجينيرينگ» جشس باس ديرەكتورى باقىتجان حاسانوۆ, مۇناي-گاز سالاسىنىڭ ارداگەرلەرى, گەولوگتەر, قوعام قايراتكەرلەرى جانە جاڭاوزەن قالاسىنىڭ دەپۋتاتتارى اتالعان تۇجىرىمدامانى تالقىلادى.
سوعان سايكەس وڭالتۋ شارالارىنىڭ ناتيجەسىندە كەن ورىندارىنداعى مۇناي ءوندىرۋ دەڭگەيى بىرنەشە جىل ارالىعىندا كەزەڭ-كەزەڭىمەن 6-6,5 ملن تونناعا دەيىن جەتۋگە ءتيىس. جوسپارلانعان ىستەر وسى كورسەتكىشتى الداعى 10 جىل بويى ساقتاپ تۇرۋعا مۇمكىندىك بەرەدى.
«قازمۇنايگاز» ۇلتتىق كومپانياسى» اق باسقارما توراعاسى ماعزۇم مىرزاعاليەۆتىڭ پايىمىنشا, ازىرلەنىپ جاتقان جوسپار جاڭاوزەن قالاسىنىڭ الەۋمەتتىك-ەكونوميكالىق تۇراقتىلىعىن قامتاماسىز ەتۋگە دە ەلەۋلى ۇلەس قوسادى.
– بۇگىندە «وزەنمۇنايگاز» مۇناي ءوندىرۋ كورسەتكىشتەرىن تولىق ورىنداي الماي وتىر. تەحنيكالىق جانە گەولوگيالىق ماسەلەلەرگە بايلانىستى مۇناي ءوندىرۋ كولەمىن بىرقالىپتى دەڭگەيدە ۇستاپ تۇرۋ قيىنعا سوعۋدا. جىل سايىنعى كۇردەلى سالىمداردىڭ دەڭگەيىنە قاراماستان, «وزەنمۇنايگازعا» قاراستى كەن ورىندارىندا مۇناي ءوندىرۋ كولەمى ازايىپ بارادى. سونىڭ سالدارىنان كومپانيانىڭ كىرىسى تومەندەپ, قازىرگى قىزمەتكەرلەر سانىن ساقتاپ قالۋ مەن ولارعا ەڭبەكاقى تولەۋدە تۇيتكىل تۋىندايدى. بولجام بويىنشا كومپانيا 2024 جىلى تابىس تيىمدىلىگىنىڭ شەگىنە جەتەدى, – دەدى «قازمۇنايگاز» ۇلتتىق كومپانياسى» اق باسقارما توراعاسى.
ماعزۇم مىرزاعاليەۆ جۇمىس ساپارى بارىسىندا ماڭعىستاۋ وبلىسىنىڭ كاسىپوداق ۇيىمدارى باسشىلارىمەن دە كەزدەستى. كەزدەسۋ بارىسىندا ەڭبەك ۇجىمدارىن ءجيى تولعاندىراتىن ماسەلەلەر كوتەرىلدى. ولاردىڭ قاتارىندا ەڭبەكاقى جانە كەنىشتەردە ەلەكتر ەنەرگياسىنىڭ ءجيى ءوشىرىلۋى بار.
«قازمۇنايگاز» باسشىسى جاڭاوزەن قالاسىن دامىتۋعا باعىتتالعان كومپانيا جوبالارىنا بولەك توقتالدى. الداعى ۋاقىتتا بۇل قالادا «استراحان-ماڭعىستاۋ» ماگيسترالدى سۋ قۇبىرىن رەكونسترۋكتسيالاۋ جانە كەڭەيتۋ, كەندىرلىدە سۋ تۇششىتۋ زاۋىتىن جانە جاڭاوزەندە جاڭا گاز وڭدەۋ زاۋىتىن سالۋ جوبالارى جۇزەگە اسىرىلماقشى.
سونىمەن قاتار جاڭاوزەن قالاسىنا الەۋمەتتىك قولداۋ كورسەتۋ اياسىندا كومپانيا ەكى سپورت كەشەنىنىڭ قۇرىلىسىن اياقتاۋعا تاياۋ. وقۋشىلار سارايىنىڭ قۇرىلىسى باستالدى. بۇعان قوسا, قالادا 16 سپورت الاڭىن سالۋ تۋرالى شەشىم قابىلداندى. سونداي-اق ۇلتتىق كومپانيا «جارقىن بولاشاق» باعدارلاماسى بويىنشا جاڭاوزەننىڭ ەلىمىزدىڭ ۇزدىك كوللەدجدەرى مەن مەكتەپ-ينتەرناتتارىنا وقۋعا قابىلدانعان دارىندى بالالارىنا وقۋ مەن باسپانا اقىسىن تولەيدى.