نۇر-سۇلتاندا قۇرىلىس الاڭىندا جۇمىس ىستەپ جاتقان 20 جاستاعى قۇرىلىسشى كوز جۇمدى, دەپ حابارلايدى Egemen.kz.
قايعىلى وقيعا 28 تامىز كۇنى ساعات 10:15 شاماسىندا تۇران داڭعىلى, 65 مەكەنجايىندا ورنالاسقان «ساۋران» قۇرىلىس الاڭىندا (باس مەردىگەر «ابىلاي قۇرىلىس» جشس) بولعان.
وقيعا جايىندا ونەركاسىپتىك قاۋىپسىزدىك كوميتەتىنىڭ نۇر-سۇلتان قالالىق دەپارتامەنتىنەن تۇسىنىكتەمە بەردى.
«قازاقستان رەسپۋبليكاسى توتەنشە جاعدايلار مينيسترلىگى ونەركاسىپتىك قاۋىپسىزدىك كوميتەتىنىڭ نۇر-سۇلتان قالالىق دەپارتامەنتى ينسپەكتورلارى دەرەۋ وقيعا ورنىنا اتتاندى. انىقتالعانداي, جۇمىستى ورىنداۋ بارىسىندا 2002 جىلى تۋعان جىگىت مۇنارا كرانىنىڭ باسقارۋ كابيناسىنان قۇلاپ كەتكەن. ول العان جاراقاتتارىنان سول جەردە كوز جۇمدى», دەپ حابارلادى ۆەدومستۆودان.