قر يدم ازاماتتىق اۆياتسيا كوميتەتىنىڭ توراعاسى ۆەتنام مەن قازاقستان اراسىنداعى جولاۋشى رەيستەرىن جاڭعىرتۋ تۋرالى ۆەتنامدىق تاراپپەن كەلىسىم جاسالعانىن ءمالىم ەتتى, دەپ حابارلايدى Egemen.kz.
قر يدم ازاماتتىق اۆياتسيا كوميتەتىنىڭ ءباسپاسوز قىزمەتى حابارلاعانداي, ۆەدومستۆو توراعاسى تالعات لاستاەۆ ۆەتنام سوتسياليستىك رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى فام تحاي نى ماي جانە «Vietjet Air» اۋە كومپانياسىنىڭ وكىلى نگۋەن چي تاممەن كەزدەستى.
«كەزدەسۋ بارىسىندا ۆەتنام تاراپى قازاقستانعا تۇراقتى جولاۋشىلار رەيستەرىن ورىنداۋعا دايىندىعىن ءبىلدىردى», دەلىنگەن كوميتەت حابارلاماسىندا.
10 قازاندا كامران – الماتى باعىتى بويىنشا «Vietjet Air» اۋە كومپانياسىنىڭ العاشقى رەيسىن اشۋ جوسپارلانىپ جاتىر. سونىمەن قاتار اۆياكومپانيا كامران قالاسىنان نۇر-سۇلتان قالاسىنا رەيستەر اشۋدى جوسپارلاپ وتىر. رەيستەر Airbus ا-330 ءتيپتى اۋە كەمەلەرىندە اپتاسىنا 2-3 رەت جيىلىكپەن ۇشاتىن بولادى.
«قازىرگى ۋاقىتتا «Vietjet Air» اۆياكومپانياسى قازاقستان اۋماعىندا شەتەلدىك اۆياتاسىمالداۋشى رەتىندە اككرەديتتەۋدەن وتۋگە دايىندالۋدا. تاراپتار ەكى ەل اراسىنداعى ساۋدا-ەكونوميكالىق, ينۆەستيتسيالىق, تۋريستىك جانە مادەني ىنتىماقتاستىقتى ودان ءارى دامىتۋ ءۇشىن تىكەلەي اۋە قاتىناسىنىڭ ماڭىزدىلىعىن اتاپ ءوتتى», دەلىنگەن حابارلامادا.
كەزدەسۋ قورىتىندىسى بويىنشا تاراپتار قازاقستان مەن ۆەتنام اراسىنداعى تىكەلەي تۇراقتى اۋە قاتىناسىن جاڭارتۋ جونىندەگى جۇمىستى جالعاستىرۋعا كەلىستى.