قر پرەمەر-ءمينيسترى ءاليحان سمايىلوۆ قۇرىلىس سالاسىن رەفورمالاۋ جانە ونىڭ باسەكەگە قابىلەتتىلىگىن ارتتىرۋ ماسەلەلەرى جونىندە كەڭەس وتكىزدى, دەپ حابارلايدى Egemen.kz.
يندۋستريا جانە ينفراقۇرىلىمدىق دامۋ ۆيتسە-ءمينيسترى ەركەبۇلان داۋىلباەۆ ءوزىنىڭ بايانداماسىندا قۇرىلىس سالاسىنىڭ تيىمدىلىگىن ارتتىرۋ تەتىكتەرىن ازىرلەۋ قورىتىندىلارى بويىنشا زاڭنامالىق تۇزەتۋلەر پاكەتى دايىندالعانىن اتاپ ءوتتى.
وسىلايشا, جاڭا نورمالاردى ەنگىزۋدىڭ ارقاسىندا شاعىن جانە ورتا بيزنەستىڭ مەملەكەتتىك ساتىپ الۋعا قاتىسۋ مۇمكىندىكتەرىن كەڭەيتۋ, زاڭسىز جانە ءونىمسىز قوسالقى مەردىگەرلەردىڭ, سونداي-اق بىلىكتىلىگى جوق ليتسەنزياتتاردىڭ قىزمەتىن شەكتەۋ جوسپارلانۋدا.
«بۇدان باسقا, نارىق سۋبەكتىلەرىنە جەر ۋچاسكەلەرىن الۋ كەزىندە تەڭ مۇمكىندىكتەر بەرۋ, ۇلەستىك قۇرىلىس سالاسىن جەتىلدىرۋ جانە بۇكىل سالا بويىنشا لايىقتى ەڭبەكاقى تولەۋدى قامتاماسىز ەتۋ جوسپارلانۋدا», دەلىنگەن ۇكىمەتتىڭ ءباسپاسوز قىزمەتى تاراتقان حابارلامادا.
زاڭنامالىق تۇزەتۋلەردى قابىلداۋ قۇرىلىس كولەمىن بىركەلكى بولۋگە, ورىندالاتىن جۇمىستاردىڭ ساپاسى مەن اشىقتىعىن ارتتىرۋعا مۇمكىندىك بەرەدى دەپ كۇتىلۋدە.
پرەمەر-مينيستر ۇسىنىلعان جاڭا ەنگىزىلىمدەردىڭ نەگىزگى بولىگىن قولداپ, مۇددەلى مەملەكەتتىك ورگاندارعا ەسەپتەۋلەردى قاجەت ەتەتىن تۇستاردى قوسىمشا پىسىقتاۋدى تاپسىردى.