قازاقستاننىڭ كاسىپقوي فۋتبول ليگاسى 2022 جىلعى شىلدە ايىنداعى ەڭ ۇزدىك ويىنشىسىن انىقتاۋ ماقساتىندا OLIMPBET فۋتبولدان قازاقستان چەمپيوناتىندا دوپ تەبەتىن كوماندالارىنىڭ باس باپكەرلەرى مەن كاپيتاندارى اراسىندا ساۋالداما وتكىزدى.
ءداستۇر بويىنشا ساۋالداماعا قاتىساتىن رەسپوندەنتتەردىڭ ارقايسىسى وزدەرىنىڭ كوزقاراسى بويىنشا ءبىر ايدا ورەلى ونەرىمەن كوزگە تۇسكەن ءۇش ۇزدىك فۋتبولشىنى تاڭداپ الىپ, ءارى قاراي, ورىندارعا بايلانىستى ويىنشىلارعا ۇپايلار بەرەدى. ماسەلەن, ەڭ ۇزدىك دەپ تاپقان فۋتبولشىسىنا 3 ۇپاي, كەيىنگىسىنە – 2, سوڭعىسىنا 1 ۇپاي بەرەدى. ناتيجەسىندە, بارلىق ۇپايلار جيناقتالىپ, ايدىڭ ۇزدىگى انىقتالادى.
شىلدە ايىنىڭ ساۋالداما قورىتىندىسى بويىنشا قازاقستاننىڭ ەڭ ۇزدىك فۋتبولشىسى دەپ «ورداباسى» مەن قازاقستان ۇلتتىق قۇراماسىنىڭ جارتىلاي قورعاۋشىسى ەلحان استانوۆ تانىلدى. شىلدە ايىندا «ورداباسى» ساپىندا بەس ويىندا (چەمپيوناتتا ءبىر, كۋبوك جولىنداعى باسەكەدە ءتورت ماتچ) جاسىل الاڭعا شىققان استانوۆ ءۇش گول سوعىپ, ارىپتەستەرىنە ءۇش مارتە ناتيجەلى پاس بەرگەن. ساۋالدامادا ول 51 ۇپاي جينادى. ەكىنشى ورىندى «ماقتاارال» شابۋىلشىسى رامازان كارىموۆ يەلەنسە, ۇزدىك ۇشتىكتى «استانانىڭ» پورتۋگاليالىق جارتىلاي قورعاۋشىسى پەدرو ەۋجەنيو تۇيىندەدى.
سونداي-اق «ورداباسى» كلۋبىنىڭ باس باپكەرى الەكساندر سەدنەۆ شىلدە ايىنىڭ ەڭ ۇزدىك باپكەرى اتاندى. ساۋالداماعا قاتىسقان 14 باپكەردىڭ بەسەۋى ءوز داۋىسىن بەلارۋس مامانىنا بەرگەن. الەكساندر سەرگەەۆيچ بيىلعى ماۋسىمدا وسىمەن ەكىنشى رەت ايدىڭ ۇزدىك باپكەرى بولىپ تانىلدى. بۇعان دەيىن ول ءساۋىر ايىندا ۇزدىك شىققان ەدى.
ەكىنشى ورىندى پەتروپاۆلدىڭ «قىزىلجارىن» جاتتىقتىراتىن قازاقستاندىق جاس مامان ءالي اليەۆ يەلەندى. ول وتكەن ايدا ۋەفا كونفەرەنتسيالار ليگاسىندا سەنساتسيا جاساپ, حورۆاتيالىق «وسيەك» كلۋبىنان باسىم تۇسكەن بولاتىن. سونداي-اق شىلدە ايىنىڭ قورىتىندىسى بويىنشا ءۇشىنشى ورىندى نۇركەن مازباەۆ («تاراز») پەن اندرەي فەراپونتوۆ («ماقتاارال») ءوزارا ءبولىستى.
سونىمەن قاتار ەكىنشى ليگادا «تۇراننىڭ» جاستار كومانداسىنىڭ شابۋىلشىسى باقداۋلەت زۋلفىقاروۆ ءتورتىنشى اي قاتارىنان «وڭتۇستىك-باتىس» كونفەرەنتسيانىڭ ۇزدىك ويىنشىسى اتاندى. شىلدە ايىندا زۋلفىقاروۆ «اتىراۋ جاستار» كومانداسىنىڭ قاقپاسىنا جەڭىس گولىن سوعىپ, جارىستىڭ سۇرمەرگەندەر تىزىمىندە كوش باستادى. ەكىنشى ورىندى «وڭتۇستىك اكادەمياسىنىڭ» جاستار كومانداسىنىڭ شابۋىلشىسى ماعجان توقتىباي يەلەندى. ۇزدىك ۇشتىكتى «تۇران» جاستار كومانداسىنىڭ تاعى ءبىر فۋتبولشىسى عاني سۇلەيمەن قورىتىندىلادى.
ايتا كەتەيىك, ەرتەڭ قازاقستان كۋبوگى جولىنداعى توپتىق كەزەڭنىڭ سوڭعى تۋر ويىندارى باستالدى. بۇل تۋردا «كاسپي» – «اقجايىق», «ماقتاارال» – «تاراز», «قايرات» – «اتىراۋ», «اقسۋ» – «ورداباسى», «جەتىسۋ» – «تۇران», «شاحتەر» – «استانا», «اقتوبە» – «توبىل», «قايسار» – «قىزىلجار» كلۋبتارى كەزدەسەدى.