وتكەن اپتادا قازاقستاندىق تەننيسشىلەر وزبەكستان, وڭتۇستىك افريكا رەسپۋبليكاسى, گەرمانيا جانە تاعى باسقا مەملەكەتتەردە ۇيىمداستىرىلعان بىرنەشە حالىقارالىق تۋرنيردە ونەر كورسەتىپ, جارىس جەڭىمپازدارى اتاندى.
وزبەكستاندا وتكەن 18 جاسقا دەيىنگى تەننيسشىلەر اراسىنداعى ءۇشىنشى ساناتتاعى ITF تۋرنيرىندە قازاقستاندىق اسىلجان ارىستانبەكوۆا مەن ايا نۇپباي توپ جاردى. ايا مەن اسىلجان جۇپتىق سىندا باق سىناپ, فينالدا تاعى ءبىر قازاقستاندىق ادەمى امانكەلدى مەن رەسەيلىك ۆيكتوريا ميلوۆانوۆا جۇبىن ۇتتى – 6:4, 6:7 (5:7), 10:7. وسىلايشا, قازاقستاندىق دۋەت ءوز سپورتتىق جولىندا جەتىنشى, بيىلعى بەسىنشى تيتۋلىنا قول جەتكىزدى.
سونداي-اق وڭتۇستىك افريكا رەسپۋبليكاسىندا ءبىرىنشى ساناتتاعى ITF Juniors جارىسى اياقتالدى. مۇندا جانەل رۇستەموۆا جۇپتىق سىندا فينالعا دەيىن جەتىپ, ەستونيالىق ەليزابەت ليلامەن بىرگە سوڭعى باسەكەدە دودانىڭ ەكىنشى راكەتكالارى ۇلىبريتانيالىق ەللا ماكدونالد پەن يتاليالىق اننا پاراديسيگە جول بەردى – 1:6, 3:6.
بۇدان بولەك, قازاقستاندىق جاس تەننيسشىلەر 14 جانە 12 جاسقا دەيىنگىلەر اراسىندا Tennis Europe سايىستارىندا دا تابىستى ونەر كورسەتتى. گەرمانيانىڭ اۋسبۋرگ قالاسىندا ۇيىمداستىرىلعان Bavarian Junior Open (U14) جارىسىندا سوفيا يساكوۆا جۇپتىق سىندا ۋكراينالىق اناستاسيا سورسكامەن بىرگە فينالدا يسپانيالىق ۆەگا فەرناندەس پەن چەحيالىق ۆانەسسا سۆوبودوۆاعا ەسە جىبەردى – 3:6, 6:4, 4:10. جەكەلەي سىندا س.يساكوۆا جارتىلاي فينالعا دەيىن جەتتى.
ال بەلگرادتا 12 جاسقا دەيىنگىلەر اراسىنداعى جارىستا گيورگي برەگۆادزە ىرىكتەۋ سايىستارىنان باستاپ نەگىزگى دودادا سەربيالىق, گەرمانيالىق, يزرايلدىك قارسىلاستارىن تىزە بۇكتىردى. شيرەك فينالدا فرانتسيالىق تەننيسشىدەن ايلاسىن اسىردى – 6:2, 7:6. تەك جارتىلاي فينالدا رەسەيلىك تيمۋر گوردەەۆتەن ۇتىلىپ قالدى. ال جۇپتىق سىندا ءدال وسى رەسەيلىك ت.گوردەەۆپەن بىرگە جۇپ قۇراپ, فينالدا سلوۆەنيالىق-ماكەدونيالىق دۋەتتەن جەڭىلدى – 2:6, 7:6 (7:2), 0:10. وسى جارىستىڭ قىزدار باسەكەسىندە لينارا بولەشەۆا مەن سوفيا كيروۆا فينالدا سۋپەر تاي-برەيكتە عانا رەسەيلىكتەرگە ەسە جىبەردى – 6:4, 6:7 (2:7), 8:10.
ال بىرەر كۇن بۇرىن وسكەمەندە ايەلدەر اراسىنداعى ITF World Tennis Tour W25 ءتۋرنيرى باستالدى. جۇلدە قورى 25 مىڭ اقش دوللارىنا باعالانعان جارىستىڭ ىرىكتەۋ ساتىسىندا وسكەمەندىك ماليكا امىرعاليەۆا تاماشا ونەر كورسەتتى. ماليكا WTA رەيتينگىندە جوقتىعىنا قاراماستان, ىرىكتەۋ سايىستارىنىڭ فينالىندا الەمنىڭ 1990-راكەتكاسى رەسەيلىك 18 جاستاعى نيكول ميشيەۆادان 6:1, 6:4 ەسەبىمەن باسىم ءتۇستى. ءسويتىپ, نەگىزگى كەزەڭگە جولداما الدى. وسىلايشا, Kazzinc Open جارىسىندا بەس بىردەي قازاقستاندىق سپورتشى, اتاپ ايتقاندا جىبەك قۇلامباەۆا, گوزال اينيتدينوۆا, ماريا سينيتسىنا (ۋايلد كارد), تاتيانا نيكولەنكو (ۋايلد كارد) جانە ماليكا امىرعاليەۆا باق سىنايتىن بولدى.