بيىل قازاقستاندا 11 763 الاياقتىق جاساۋ وقيعاسى تىركەلدى, دەپ حابارلايدى Egemen.kz.
ىشكى ىستەر مينيسترلىگىنىڭ وكىلى شۇعىلا تۇرلىبەكتىڭ ايتۋىنشا, ينتەرنەت-الاياقتىققا قارسى بىرلەسكەن جۇمىستى تالقىلاۋ ماقساتىندا مينيسترلىكتە ارنايى وتىرىس ءوتتى.
«جيىنعا قازاقستان رەسپۋبليكاسىنىڭ تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ وكىلدەرى قاتىستى. سونداي-اق بايلانىس وپەراتورلارىنىڭ باسشىلارى مەن جاۋاپتى ماماندارى كەزدەسۋگە ونلاين رەجيمدە قوسىلدى. كەڭەستە سوڭعى التى جىلدا ينتەرنەت-الاياقتىق فاكتىلەرىنىڭ سانى ايتارلىقتاي ارتقانى اتاپ ءوتىلدى», دەدى شۇعىلا تۇرلىبەك ۆەدومستۆونىڭ ونلاين بريفينگىسىندە.
2016 جىلى وسىنداي مىڭ قىلمىس تىركەلسە, 2021 جىلى الاياقتىق سانى 21 مىڭعا دەيىن وسكەن. جىل باسىنان بەرى 11 763 وقيعا تىركەلىپ, الاياقتاردىڭ كەسىرىنەن 7 ملرد تەڭگە شىعىن كەلتىرىلدى. 571 قىلمىسكەر, 17 ۇيىمداسقان قىلمىستىق توپ ۇستالدى.
«بۇعان دەيىن مينيسترلىكتىڭ باستاماسى بويىنشا ونلاين-قارىز الۋ كەزىندە كليەنتتەردى سايكەستەندىرۋدىڭ بانكتىك راسىمدەرى قاتاڭداتىلدى. قازىرگى كەزدە الاياقتار ابونەنتتىك نومىرلەردى اۋىستىرۋ بويىنشا سەرۆيستەردى, تەلەفوندارعا قاشىقتان قول جەتكىزۋ ءۇشىن ارنايى قوسىمشالاردى پايدالانادى. سونداي-اق ولاردىڭ اراسىندا شەتەلدەن ارەكەت ەتەتىندەر دە بار. جالپى, اۋىستىرۋ نومىرلەرىن بۇعاتتاۋ جۇيەسى تەلەفوندىق الاياقتىق فاكتىلەرىن ازايتۋى كەرەك. بۇگىندە ونى قازاقستاندىق بايلانىس وپەراتورلارى بەلسەندى تۇردە ينتەگراتسيالاپ جاتىر», دەدى شۇعىلا تۇرلىبەك.