وسىدان بىرەر كۇن بۇرىن قازاقستاندىق جانە رەسەيلىك باق بەتتەرىندە فۋتبولدان قازاقستان ۇلتتىق قۇراماسىنىڭ باس باپكەرى ماگومەد اديەۆ رەسەيدىڭ «ۋرال» كومانداسىنىڭ باس باپكەرى بولۋى مۇمكىن دەگەن اقپارات تاراپ, قازاقستاندىق جانكۇيەرلەردى الاڭداتىپ قويعان ەدى.
الايدا قازاقستان فۋتبول فەدەراتسياسىنىڭ ءباسپاسوز قىزمەتىنە سۇحبات بەرگەن ماگومەد اديەۆ بۇل اقپاراتتىڭ شىندىققا جاناسپايتىنىن ايتىپ, ۇلتتىق قۇراماداعى قىزمەتىن جالعاستىرا بەرەتىنىن جەتكىزدى. «مەنىڭ قازاقستان فۋتبول فەدەراتسياسىمەن كەلىسىمشارتىم بار, ءالى اياقتالعان جوق. الدا ءبىزدى ماڭىزدى ەكى ويىن كۇتىپ تۇر. سول سەبەپتى كەلىسىم اياقتالماي, ەشقايدا كەتپەيمىن. ەشقانداي كۇمان كەلتىرۋدىڭ قاجەتى جوق», دەدى م.اديەۆ.
ايتا كەتەيىك, قازاقستان ۇلتتىق قۇراماسى قىركۇيەكتە ۇلتتار ليگاسى اياسىندا ەلوردادا بەلارۋس قۇراماسىن قابىلداسا, سىرت الاڭدا ازەربايجان فۋتبولشىلارىمەن كەزدەسەدى.