جالعىز التىندى قاناعات تۇتتىق

دزيۋدودان قازاقستان قۇراماسىنىڭ باس باپكەرى نۇربول سۇلەيمەنوۆ وتكەن جارىستاردىڭ قورىتىندىسى بويىنشا ازيا چەمپيوناتىنا قاتىساتىن بالۋانداردى ىرىكتەپ الدى. ولاردىڭ قاتارىندا الەم چەمپيوناتىنىڭ جۇل­دە­گەرلەرى عۇسمان قىرعىزباەۆ (66 كگ) پەن ەرلان سەرىكجانوۆ (66 كگ), ازيا چەمپيوناتىنىڭ ءۇش دۇركىن جۇلدەگەرى يسلام بوزباەۆ (-100 كگ), حورۆاتياداعى Grand Slam جارىسىنىڭ جەڭىمپازى ماعجان شامشادين (60 كگ) جانە Grand Slam باسەكەلەرىنىڭ جۇلدەگەرى باۋىرجان نارباەۆ (60 كگ) بار ەدى. وكىنىشكە قاراي, رەيتينگتىك ۇپاي بەرى­لە­تىن ءباسى بيىك جارىستا جوعارىدا اتى اتالعان داڭقتى بالۋاندارىمىزدىڭ بىردە ءبىرى ءانۇرانىمىزدى شىرقاتا المادى.

جەرلەستەرىمىزدىڭ اراسىنان ەڭ ءتا­ۋىر ناتيجەگە 73 كيلودا باق سىناعان دانيار شامشاەۆ قول جەتكىزدى. ۇلتتىق قۇراما ساپىنا جۋىردا عانا قوسىل­عان بالۋانىمىز ەرەسەكتەر ارا­سىن­داعى العاشقى ازيا چەمپيوناتىنا قاتىسىپ جاتقانىنا قاراماستان بارلىق قارسىلاسىن مەرزىمىنەن بۇرىن ايقىن باسىمدىقپەن تىزە بۇكتىرىپ, ازيا چەمپيونى اتاندى. اتاپ ايتار بولساق, ول باستاپقى باسەكەلەرىندە ۇندىستاندىق سۋرەش سينگح پەن Grand Slam, گران-پري جارىستارىنىڭ جۇلدەگەرى تاجىكستاندىق بەحرۋز حود­جا­زو­دانى نەبارى 42 سەكۋندتا جەڭسە, جارتىلاي فينالدا بيىل عانا جاس­ت­ار اراسىنداعى ازيا چەمپيوناتىن­دا توپ جارعان قىرعىز بالۋانى چىنگىزحان ساگىناليەۆتى 31 سەكۋندتا تىزە بۇكتىردى. فينالدا ونىڭ جولى وزبەكستاننىڭ بەدەلدى بالۋانى, جىل باسىندا پور­تۋ­گا­ليادا ۇيىم­داستىرىلعان گران-پري جارىسى­نىڭ جەڭىمپازى مۋرودجون يۋلداشەۆپەن قيىستى. دانيار بۇل باسە­كەدە دە ارتىق كۇش جۇمساماي, بار-جوعى 34 سەكۋندتا-اق قارسىلاسىنىڭ جاۋى­رىنىن جەر يىسكەتتى.

بۇل – ازيا چەمپيوناتتارى تاري­حىنداعى قازاقستاننىڭ 73 كيلو سال­ماق­تاعى العاشقى التىنى. بۇعان دەيىن ديدار حامزا مەن جانساي سماعۇلوۆ جۇلدەگەرلەر قاتارىنان كورىنگەنىمەن, بىردە-ءبىر بالۋانىمىز بۇل سالماقتا توپ جارا الماي كەلە جاتقان ەدى.

ال 100 كيلوعا دەيىنگى سالماقتا بەلدەسكەن يسلام بوزباەۆ باس جۇلدەگە سىنىق سۇيەم قالعاندا ءسۇرىنىپ, كۇمىس جۇلدەنى قاناعات تۇتۋعا ءماجبۇر بولدى. جەرلەسىمىز فينالدا بيىلدان باس­تاپ بىرىككەن اراب امىرلىكتەرىنىڭ اتىنان سىنعا تۇسە باستاعان ينگۋشيالىق دجافار كوستوەۆتان ۇتىلىپ قالدى. كەزىندە رەسەيدىڭ جاستار اراسىنداعى چەمپيوناتىندا توپ جارىپ, ەۋروپا بىرىنشىلىگىندە دە ۇزدىك شىققان ول ەندى, مىنە, ازيا بىرىنشىلىگىندە التىننان القا تاقتى. بۇعان دەيىن 90 كيلودا ونەر كورسەتكەن يسلام بوزباەۆتىڭ بۇل 100 كيلوداعى العاشقى ءىرى جارىسى. ول جارىستان كەيىن فينالداعى جەڭىلىسىن جاڭا سالماققا ءالى بوي ۇيرەتپەگەنى مەن كۇشىن دۇرىس جۇمساي الماعاندىعىمەن بايلانىستىردى.

باپكەرلەر مەن جانكۇيەرلەر ەرەكشە سەنىم ارتقان ماعجان شامشادين (60 كگ), عۇسمان قىرعىزباەۆ (66 كگ), ديدار حامزا (90 كگ) جانە نۇرلىحان شارحان (-100 كگ) قولا جۇلدەنى قاناعات تۇتۋعا ءماجبۇر بولدى. وكىنىشكە قاراي, باۋىرجان نارباەۆ (60 كگ), ەرلان سەرىكجانوۆ (73 كگ) پەن ءادىل ورازباەۆ (+100 كگ) ىرىكتەۋ كەزەڭدەرىنەن ارىگە اسا المادى.

قىزدار اراسىنداعى بالۋاندار باسەكەسىندە نەبارى ەكى وتانداسىمىز عانا جۇلدەگەرلەر قاتارىنان كورىندى. بىلتىر قىرعىزستاندا ۇيىم­داس­تى­رى­لعان ازيا چەمپيوناتىندا كۇمىس العان 48 كيلوداعى وتانداسىمىز ءابيبا ابۋجاقىنوۆا بيىل دا سول مەجەدەن كورىندى. جارتىلاي فينالدا ول بىرەر اي بۇرىن موڭعوليادا وتكەن Grand Slam باسەكەسىندە جەڭگەن موڭعول بالۋانى نارانتسەتسەگ گانبااتاردان تاعى دا باسىم ءتۇسىپ, فينالعا جولداما العان بولاتىن. الايدا التىن جۇلدە ءۇشىن وتكەن باسەكەدە ءابيبا جاپونيالىق ۋاكانا كوگادان ايلاسىن اسىرا المادى. ال 78 كيلوعا دەيىنگى سالماقتا سىنعا تۇسكەن ارۋنا جانگەلدينا جۇ­بانىش بەلدەسۋىندە تايبەيلىك ليۋ ءشيندى جەڭىپ, ازيا بىرىنشىلىگىنىڭ قولا جۇلدەگەرى اتاندى.

وسىلايشا, ءتورت كۇنگە جالعاسقان سارى قۇرلىق بىرىنشىلىگىندە سەگىز مەدال ولجالاعان جەرلەستەرىمىز جالپى­كو­­ماندالىق ەسەپتە ءتورتىنشى ورىنعا تابان تىرەدى. باس جۇلدەنى جاپونيا بالۋان­دارى جەڭىپ الدى. ولاردىڭ ەنشى­سىن­دە 9 التىن, 3 كۇمىس جۇلدە بار. ەكىنشى جانە ءۇشىنشى ورىنعا موڭعوليا (2 التىن, 5 قولا) جانە وزبەكستان (1 التىن, 2 كۇمىس, 6 قولا) قۇرامالارى جايعاستى.