ترانسفەردەگى ساۋدا قىزىپ تۇر

بيىلعى ماۋسىمارالىق ۇزىلىس­تەگى «بارىستىڭ» كادرلىق اۋىس-تۇيىسىنە نازار سالاتىن بولساق, كلۋب قاتارىن قورعاۋشىلار – ميحايل گريگورەۆ (رەسەي) پەن دجەسسي گرەم (كانادا), امەريكالىق شابۋىلشىلار – دجەرەمي براككو مەن ەنتوني لۋيس جانە رەسەيلىك كيريلل ماكسيموۆ تولىقتىردى.

2011 جىلى ءوفونىڭ «سالاۆات يۋلاەۆ» كلۋبىمەن بىرگە گاگارين كۋبوگىندا توپ جارعان 31 جاستاعى رەسەيلىك قورعاۋشى ميحايل گريگورەۆ ەلوردالىق كوماندا ساپىندا كەلەسى جىلدىڭ 30 ساۋىرىنە دەيىن ونەر كورسەتەدى. ول 2012/13 جىلعى قحل ماۋسىمىندا «بارىس» كلۋبىندا ويناعانىن دا ايتا كەتەيىك. ميحايل گريگورەۆ ءار جىلدارى «اۆانگارد», «سپارتاك», «دينامو» (ماسكەۋ) كلۋبتارى جەيدەسىندە مۇزايدىنعا شىعىپ, بىلتىرعى ماۋسىمدى ماگنيتوگورسكىنىڭ «مەتاللۋرگىندا» وتكىزدى. گاگارين كۋبوگىنىڭ فينالىنا دەيىن جەتكەن ول ءبىر ماۋسىمدا 24 ويىندا مۇزايدىنعا شىعىپ, ەكى مارتە ارىپتەستەرىنە ناتيجەلى پاس اسىرعان. اسا جاقسى ناتيجە ەمەس, ارينە.

28 جاستاعى كانادالىق حوك­كەي­شى دجەسسي گرەم مەن «بارىس» اراسىنداعى كەلىسىم ءبىر ماۋسىمعا جوسپارلانعان (2023 جىلدىڭ 30 ساۋىرىنە دەيىن). ءار جىلدارى سولتۇستىك امەريكانىڭ ءتۇرلى ليگالارىندا ونەر كورسەتكەن قورعاۋشى بىلتىرعى ماۋسىمدى گەرمانيانىڭ «پانتەر» كلۋبىندا وتكىزدى. گەر­مانيا چەمپيوناتىندا 52 ماتچتا مۇزايدىنعا شىعىپ, 42 (3+39) ۇپاي جيناعان. بۇل ناتيجەمەن ول ءوز كومانداسىنىڭ ۇزدىك ءبومبارديرى اتانىپ, ليگانىڭ ەڭ ناتيجەلى قورعاۋشىلارى تىزىمىندە ەكىنشى ورىنعا يە بولدى.

سونداي-اق «بارىس» جۋىردا امەريكالىق شابۋىلشى دجەرەمي براككومەن دە بىرجىلدىق كەلى­سىم­شارت جاساسقانىن حابارلادى. براككو دا دجەسسي گرەم سياقتى كارەراسىن سولتۇستىك امەريكا كلۋبتارىندا باستاعان. اقش-تىڭ جاسوسپىرىمدەر جانە جاستار قۇراماسىنا شاقىرتۋ العان ول 2015 جىلى جاستار ساپىندا الەم چەمپيونى اتاندى. 2015 جىلدان باستاپ «تورونتو» جانە «تورونتو مارليس» كلۋبتارىندا ونەر كورسەت­كەن شابۋىلشى بىلتىر ءوز باعىن گەرمانيا بىرىنشىلىگىندە سىناپ كوردى. جەرگىلىكتى «كرەفەلد پينگۆين» جەيدەسىن كيگەن ول وتكەن ماۋسىمداعى 54 ماتچتا 54 (14+40) ۇپاي جيناپ, كومانداسىنىڭ ەڭ ۇزدىك شابۋىلشىسى اتاندى. سونداي-اق ناتيجەلى پاس بويىنشا دا ۇزدىك شىقتى.

«بارىس» ساپىن تولىقتىر­عان تاعى ءبىر امەريكالىق شابۋىلشى ەنتوني ءلۋيستىڭ دە وتكەن ماۋسىم­داعى ناتيجەسى جامان ەمەس. بىلتىر «داللاستىڭ» فارم-كلۋبىندا ونەر كورسەتكەن 27 جاستاعى حوككەيشى تۇراقتى چەمپيوناتتىڭ 66 ماتچىندا مۇزايدىنعا شىعىپ, 55 (24+31) ۇپاي جيناعان. بۇگىنگە دەيىن ول سولتۇستىك امەريكانىڭ ءتۇرلى ليگالارىندا ونەر كورسەتىپ, اقش-تىڭ جاسوسپىرىمدەر مەن جاستار قۇرامالارىنا شاقىرتۋ العان. 18 جاسىندا «چيكاگو» كومانداسىنىڭ ويىنشىسى اتانعان ول كەيىنگى التى جىلىن امەريكا حوككەي ليگاسىندا (احل) وتكىزگەن. ەندى قحل-دىڭ الداعى ءبىر ماۋسىمىندا ەلوردالىق كلۋبتى جوعارى ورىندارعا سۇيرەۋگە تىرىسىپ باعادى.

سونىمەن قاتار ەلوردالىق ۇجىم ماسكەۋدىڭ تسسكا كلۋبىنان شابۋىلشى كيريلل ماكسيموۆ­تى ءبىر جىلعا جالعا الدى. 23 جاستا­عى ماكسيموۆ ءوزىنىڭ حوككەيدەگى سپورتتىق جولىن سولتۇستىك امەري­كادا باستاعان. 2017 جىلى «ەدمونتون» قۇرامىندا ويناسا, 2020/21 جىلعى ماۋسىمدا تسسكا جۇيەسىندە ونەر كورسەتىپ, قحل-دا 16 ماتچ وتكىزدى (3 ۇپاي, 2+1). بىلتىر فينليانديا چەمپيوناتىندا باق سىناعان ول «يۋكۋريت» كلۋبى ساپىندا 28 كەزدەسۋدە 9 (4+5) ۇپاي جيناعان. شابۋىلشى ءۇشىن مۇنى دا اسا جوعارى كورسەتكىش دەي الماساق كەرەك.

جاڭا ويىنشىلاردى ساتىپ الۋمەن قاتار, ەلوردالىق كلۋب قحل-دىڭ بىلتىرعى ماۋسىمىندا ناتيجەلى ويىنىمەن كوزگە تۇسكەن شابۋىلشىلار نيكيتا ميحايليس, اركادي شەستاكوۆ, يۋري پەتۋحوۆ, ليندەن ۆەي جانە قاقپاشى اندرەي شۋتوۆپەن جاڭا كەلىسىمشارت جاساس­قانىن حابارلادى.

سپورتتىق مانسابىن باستاعا­لى بەرى تەك «بارىس» جۇيەسىندە ويناپ كەلە جاتقان ن.ميحايليس پەن ەلوردالىق كلۋبتا 2015 جىلدان بەرى ونەر كورسەتەتىن ەگور پەتۋحوۆ جانە «بارىستا» ءۇشىنشى ماۋسىمىن وتكىزگەلى جاتقان ليندەن ۆەي كەلىسىمشارتىن ءبىر جىلعا جاڭارتقان. ال يۋري پەتۋحوۆ پەن اندرەي شۋتوۆ «بارىستا» تاعى ەكى ماۋسىم ونەر كورسەتەتىن بولدى. ال كيريلل ساۆيتسكي, انتون ساگادەەۆ, ەگور شالاپوۆ كلۋبپەن كەلىسىمشارتتارىن ۇزارتسا, ءادىل بەكەتاەۆ پەن ءاليحان اسەتوۆ كوماندانىڭ كۆاليفيكاتسيا­لىق ۇسىنىسىن قابىلداپ, «بارىسپەن» بىرگە ەكەندىكتەرىن دالەلدەدى.

سونداي-اق قازىرگى تاڭدا «با­رىس» سەگىز حوككەيشىمەن 31 تا­مىز­­عا دەيىن سىناق كەلىسىمشارتىن جاساعان. اتاپ ايتار بولساق, ولار – ماكسيم مينەەۆ, ەميل نۇرعا­ليەۆ, ۆلاديسلاۆ سيومين, يۋري سەرگيەنكو, تيمۋر فاتكۋللين, ۆلاديمير ميحاسيونوك, باتىرلان مۇراتوۆ جانە ميحايل راحمانوۆ. باپكەرلەر قۇرامى سىناق مەرزىمى بىتكەن سوڭ جاتتىعۋدا شەبەرلىگىمەن كوزگە تۇسكەن حوككەيشىلەرى مەن ءارى قاراي ۇزاق مەرزىمدى كەلىسىمشارت جاساسا الادى.

وكىنىشكە قاراي, «بارىس» ەل­وردا­لىق كلۋبتا 14 ماۋسىم وتكىز­گەن, وسى ۋاقىت ارالىعىندا كلۋب­تىڭ ليدەرى بولا بىلگەن رومان ستارچەنكونى كوماندادا ساقتاپ قالا المادى. باسقا-باسقا, كلۋب, بىزدىڭشە, ءوزىنىڭ ارداگەر ويىنشىسىن قالاي دا ۇستاپ قالۋعا تىرىسۋى كەرەك ەدى. ونىڭ سونشالىقتى كوپ قارجى تالاپ ەتپەگەنى دە تۇسىنىكتى. ەسەسىنە رەسەيدىڭ ورتاڭقول, ءتىپتى ودان دا تومەن حوككەيشىلەرىن ءوز ساناتىنا قوسىپ الۋدان اياق تارتار ەمەس. ال قازاقستان قۇراماسى­نىڭ كاپيتانى قحل-عا كەلگەن سات­تەن باستاپ كۇنى كەشەگە دەيىن تەك «بارىس» ساپىندا ونەر كورسەتتى. وسى ۋاقىت ارالىعىندا ول 740 ماتچتا مۇزايدىنعا شىعىپ, 377 ۇپاي جيناعان. ستارچەنكو وتكەن ماۋسىمدا «بارىس» ساپىندا 41 كەزدەسۋ وتكىزىپ, ءوز ەنشىسىنە 24 (9+15) ۇپاي جازدى. رومان الداعى ماۋسىمدى ماسكەۋدىڭ «سپارتاك» كلۋبىندا وتكىزەدى.

«بارىستىڭ» ماۋسىمارالىق ۇزىلىستەگى ترانسفەر ساياساتىنا جانە ­وقۋ-جاتتىعۋ جيىنىنداعى دا­­يىن­دىعىنا ءبىر ايدان كەيىن باس­تالاتىن قحل-دىڭ جاڭا ماۋسى­مى بارىسىندا باعا بەرۋگە بولادى. وعان دەيىن ەلوردالىق كلۋب 16 تامىزدا ءداستۇرلى «پرە­زيدەنت كۋبوگىندا» ونەر كورسەتىپ, جاڭا ماۋسىم الدىنداعى دايىندىعىن تاعى ءبىر پىسىقتاپ الادى. تۋر­نير­گە «بارىستان» بولەك, «اۆتو­مو­بيليست», «نەفتەحيميك» جانە «مەتاللۋرگ» كوماندالارى قاتى­سادى.