ۋەفا كونفەرەنتسيا ليگاسىنىڭ ىرىكتەۋ كەزەڭىنە قاتىسىپ جاتقان قازاقستاندىق ءتورت كوماندادان ءبىرىنشى بولىپ قوستانايدىڭ «توبىلى» ءتۋرنيردىڭ ءۇشىنشى اينالىمىنا جولداما الدى. العاشقى ويىندا گيبرالتاردىڭ «لينكولن رەد يمپس» كلۋبىنان باسىم تۇسكەن جەرلەستەرىمىز قارىمتا كەزدەسۋدە دە جەڭىسكە جەتتى.
وسىدان ءبىر اپتا بۇرىن «توبىل» قوستانايداعى «ورتالىق» ستاديوندا گيبرالتار چەمپيوناتىنىڭ 26 دۇركىن جەڭىمپازى – «لينكولن رەد يمپس» كلۋبىمەن شەبەرلىك بايقاسىپ, 2:0 ەسەبىمەن باسىم تۇسكەن بولاتىن. سول كەزدەسۋدە شابۋىلشى ايبار جاقسىلىقوۆ پەن قورعاۋشى چەرنوگوريالىق جاركو توماشەۆيچ گول سوعىپ, جەرگىلىكتى جانكۇيەرلەردى قۋانتقان ەدى. ال سەيسەنبى كۇنى كەشكىسىن گيبرالتارداعى بەس مىڭ جانكۇيەر سىياتىن «ۆيكتوريا» ستاديونىنداعى قارىمتا كەزدەسۋدە ميلان ميلانوۆيچ شاكىرتتەرى قارسىلاستارىنان 1:0 ەسەبىمەن ايلاسىن اسىرىپ, كونفەرەنتسيا ليگاسىنىڭ ءۇشىنشى ىرىكتەۋ كەزەڭىنە جولداما الدى.
ءبىرىنشى ماتچتاعى باسىمدىقتان كەيىن جاۋاپتى كەزدەسۋدىڭ ءفاۆوريتى سانالعان «توبىل» سىرت الاڭداعى باسەكەنىڭ العاشقى مينۋتىنان باستاپ ويىن تىزگىنىن قولىنا الىپ, الاڭ يەلەرىن ءبىراز ابىگەرگە سالدى. كەزدەسۋدىڭ 30 مينۋتىنا دەيىن جەرگىلىكتى فۋتبولشىلار «توبىلدىڭ» قارقىنىنا توتەپ بەرگەنىمەن, ءارى قاراي شاماسى جەتپەدى. ءسويتىپ, كەزدەسۋدىڭ 31-مينۋتىندا سەربيالىق لەگيونەر زوران توشيچ قارسىلاستىڭ ايىپ الاڭىندا بىرنەشە فۋتبولشىنى ەركىن الداپ ءوتىپ, جەكە شەبەرلىگىنىڭ ارقاسىندا دەيل كوۋلينگ قورعاعان قاقپادان ساڭىلاۋ تاپتى – 1:0. ءبىرىنشى تايمنىڭ سوڭىنا دەيىن ءبىزدىڭ جىگىتتەردە ەسەپتى ەسەلەيتىن بىرنەشە مۇمكىندىك بولعانىمەن, شەشۋشى ساتتە ءمۇلت كەتىپ جاتتى.
ۇزىلىستەن كەيىن دە «توبىل» فۋتبولشىلارى شابۋىلىن باسەڭدەتكەن جوق. ەكىنشى 45 مينۋتتىڭ ىشىندە قوستانايلىقتار «لينكولن رەد يمپس» قاقپاسىنا 10 سوققى جاساپ, ونىڭ تورتەۋىن قاقپاعا ءدال باعىتتادى. الايدا دەيل كوۋلينگ قىراعىلىق تانىتىپ, قاقپاسىنا بىردە-ءبىر گول وتكىزگەن جوق. الاڭ يەلەرى ەكىنشى تايمدا ەكى مارتە قاۋىپتى شابۋىل ۇيىمداستىرعانىمەن, موكيننەن ايلاسىن اسىرا المادى. وسىلايشا, ەكى ماتچتىڭ قورىتىندىسى بويىنشا 3:0 ەسەبىمەن جەڭىسكە جەتكەن «توبىل» ءتۋرنيردىڭ كەلەسى ساتىسىنا شىقتى. جەرلەستەرىمىز كونفەرەنتسيا ليگاسىنىڭ ءۇشىنشى اينالىمىندا «تيرانا» (البانيا) مەن «زرينسكي» (بوسنيا جانە گەرتسەگوۆينا) جۇبىنىڭ جەڭىمپازىمەن كەزدەسەدى. ەكى كلۋب اراسىنداعى العاشقى ويىن 20 شىلدەدە البانيادا ءوتىپ, ماتچ قوناقتاردىڭ پايداسىنا شەشىلگەن بولاتىن (0:1). قارىمتا كەزدەسۋ بۇگىن تۇندە بوسنيا جانە گەرتسەگوۆينانىڭ موستار قالاسىندا وتەدى.
بۇگىن قازاقستاننىڭ ءۇش كومانداسى – «استانا», «قايرات» جانە «قىزىلجار» كونفەرەنتسيا ليگاسىنىڭ ەكىنشى ىرىكتەۋ كەزەڭىندەگى قارىمتا ماتچتارىن وتكىزەدى. «استانا» ءوز الاڭىندا پولشانىڭ «راكۋۆ» (0:5) كلۋبىن قابىلداسا, پەتروپاۆلدىڭ «قىزىلجارى» سىرت الاڭدا حورۆاتيانىڭ «وسيەك» (1:2) كلۋبىمەن, الماتىنىڭ «قايراتى» ماجارستاندا «كيشۆاردامەن» (0:1) كەزدەسەدى.