قازاقستاندىق Astana Qazaqstan Team ۆەلوكومانداسىنىڭ كولۋمبيالىق كوشباسشىسى ميگەل انحەل لوپەس دوپينگ داۋىنا قاتىسى بار دەگەن كۇدىكپەن يسپانيادا ۇستالدى.
بيىلعى «دجيرو د’يتاليا» دوداسىندا جاراقات الىپ قالعان لوپەس ۇزاق ۋاقىت ەم-دوم شارالارىنان كەيىن وسىدان بىرەر كۇن بۇرىن يسپانياداعى Villafranca-Classic Test of Ordizia جارىسىنا قاتىسۋ ءۇشىن اتتانعان بولاتىن. ونى مادريد اۋەجايىندا ازاماتتىق گۆارديانىڭ سوت پوليتسياسى قىزمەتىنە قاراستى ورتالىق وپەراتيۆتى دەپارتامەنتىنىڭ (UCO) اگەنتتەرى ۇستاپ, تەرگەۋگە الىپ كەتكەن.
يسپانيالىق بۇقارالىق اقپارات قۇرالدارىنىڭ مالىمەتى بويىنشا, جەرگىلىكتى قۇقىق قورعاۋ ورگاندارى لوپەستى يسپانيالىق دارىگەر, فيزيولوگ ماركوس مايناردىڭ ءىسى بويىنشا ۇستاعان. دارىگەر ماركوس ماينار مارينو وسى جىلدىڭ مامىر ايىندا سپورتشىلارمەن جۇمىس ىستەۋ كەزىندە تىيىم سالىنعان پرەپاراتتاردى زاڭسىز پايدالاندى دەگەن كۇدىككە ىلىنگەن بولاتىن.
ايتا كەتەيىك, بيىل «استانا» ساپىنا قايتا ورالعان لوپەس ءار جىلدارى ءتۇرلى جارىستاردا جەڭىمپاز اتانىپ, 2018 جىلى «دجيرو د’يتاليا» جانە «يسپانيا ۆۋەلتاسىندا» ءۇشىنشى ورىنعا يە بولدى.