ءۇش اپتاعا جالعاسقان ۆەلوسپورتشىلار اراسىنداعى ەڭ بەدەلدى جارىس – «تۋر دە فرانس-2022» گراند-تۋرى مارەسىنە جەتتى. دانيانىڭ باس شاھارى – كوپەنگاگەننەن باستاۋ العان بيىلعى دودادا Jumbo-Visma ۆەلوكومانداسىنىڭ نامىسىن قورعايتىن 25 جاستاعى دانيالىق يوناس ۆينگەگوردىڭ باق جۇلدىزى جاندى. ال قازاقستاندىق Astana Qazaqstan ۆەلوكلۋبىنىڭ كاپيتانى الەكسەي لۋتسەنكو جالپى ەسەپتە توعىزىنشى ورىنعا تابان تىرەدى.
ۆەلوسپورتشىلار اراسىنداعى بەيرەسمي الەم چەمپيوناتى سانالاتىن بيىلعى «تۋر دە فرانس» باسەكەسى الدىندا Astana Qazaqstan Team ۆەلوكومانداسىنىڭ باس مەنەدجەرى الەكساندر ۆينوكۋروۆ «باستى ماقسات – كەمىندە جارىستىڭ ءبىر كەزەڭىندە جەڭىسكە جەتۋ جانە الەكسەي لۋتسەنكونىڭ جالپى ەسەپتە توپ-10 ۆەلوسپورتشىنىڭ قاتارىنا قوسىلۋى», دەگەن بولاتىن. «استانا» ۆەلوسپورتشىلارى باسشىلىقتىڭ جەكە كەزەڭدەردە توپ جارۋ ماقساتىن ورىنداي الماسا دا, الەكسەي لۋتسەنكو ۇزدىكتەر قاتارىنان كورىنىپ, سەنىمدى اقتادى.
جارىستىڭ العاشقى 10 كەزەڭىندە قالىڭ توپتىڭ ورتاسىندا جۇرگەن قازاقستاندىق ۆەلوشاباندوز 11-كەزەڭنەن كەيىن عانا بەلسەندىلىگىن ارتتىردى. ماسەلەن, 11-كەزەڭدە وتانداسىمىز مارەگە سەگىزىنشى كەلىپ, جالپى ەسەپتە توعىزىنشى ورىنعا ءبىر-اق جوعارىلادى. الايدا كەيىنگى بەس كەزەڭدە قارقىنىن باسەڭدەتىپ العان ا.لۋتسەنكو توپ-10 سپورتشىنىڭ قاتارىنان شىعىپ قالدى. ال 16-17-كەزەڭدەردە جەرلەسىمىز قايتادان شابۋىلعا شىعىپ, مارەگە بەسىنشى جانە التىنشى بولىپ جەتتى. وسى ناتيجەسىنەن كەيىن ول قايتادان الدىڭعى لەكتەن كورىندى. جارىستىڭ سوڭعى كەزەڭدەرىنە دەيىن قارقىنىن ءبىر ساتكە دە باسەڭدەتپەگەن الەكسەي وسىلايشا جىلدىڭ ەڭ ماڭىزدى گراند-تۋرىن توعىزىنشى ورىنمەن تۇيىندەدى.
ارينە «تۋر دە فرانستىڭ» ءتورت جەڭىمپازىن شىعارعان «استانا» سياقتى ەۋروپاداعى داڭقتى كوماندانىڭ بىردە-ءبىر وكىلى كەزەڭ جەڭىمپازى اتانا الماعانى وكىنىشتى. بىراق بيىلعى باسەكەگە قازاقستاندىق كوماندا نەگىزگى ۆەلوسپورتشىلارىنىڭ جاراقاتىنا بايلانىستى مۇنداي ءىرى دودالاردا اسا تاجىريبەسى جوق سپورتشىلارعا سەنىم ارتۋعا ءماجبۇر بولدى. سوندىقتان الەكسەي لۋتسەنكونىڭ ۇزدىك 10 ۆەلوشاباندوزدىڭ قاتارىنان كورىنۋىنىڭ ءوزى ءدال قازىرگى جاعدايدا ءتاۋىر كورسەتكىش دەپ ەسەپتەيمىز. ەگەر لۋتسەنكوعا ۆينچەنتسو نيبالي, ميگەل انحەل لوپەس سەكىلدى تىسقاققان تاجىريبەلى سپورتشىلار كومەكتەسكەندە, بالكىم ناتيجە بۇدان دا جاقسى بولار ما ەدى, كىم ءبىلسىن؟
ءسويتىپ, بيىلعى «تۋر دە فرانستا» وسى جارىستىڭ كەيىنگى ەكى جىلداعى جەڭىمپازى سلوۆەنيالىق تادەي پوگاچاردى (UAE Team Emirates) تۇعىردان تايدىرعان دانيالىق يوناس ۆينگەگور (Jumbo-Visma) توپ جاردى. ەكىنشى ورىندى تادەي پوگاچار يەلەنسە, ۇزدىك ۇشتىكتى 2018 جىلعى جەڭىمپاز بريتانيالىق گەراينت توماس (Ineos Grenadiers) تۇيىندەدى.
جەكەلەي اتالىمدارعا توقتالار بولساق, سپرينتەرلەر باسەكەسىندە ۇزدىك شىققان بەلگيالىق ۆاۋت ۆان ارت (Jumbo-Visma) جاسىل جەيدەگە يە بولسا, تاۋلى كەزەڭدەردىڭ كورولىنە تيەسىلى شاقپاق جەيدەنى يوناس ۆينگەگور كيدى. ال ەڭ ۇزدىك جاس ۆەلوشاباندوزعا بەرىلەتىن اق جەيدە تادەي پوگاچارعا بۇيىردى. كوماندالىق ەسەپتە بريتانيالىق Ineos Grenadiers ۇزدىك شىقسا, «استانا» ۆەلوكلۋبى 22 كوماندانىڭ ىشىنەن 10-ورىنعا جايعاستى.