فۋتزالشىلارىمىزدىڭ بىلتىرعى الەم چەمپيوناتىنداعى تاڭداي قاقتىرارلىق ناتيجەسىنەن, ۆولەيبولدان قىزدار اراسىنداعى «التاي» جانە «قۋانىش» كوماندالارىنىڭ قاتارىنان ەكى جىل ازيادا ۇزدىك شىعۋىنان, تاعى باسقا الەمدىك ارەنادا باق سىناعان كلۋبتارىمىزدىڭ ءتاۋىر كورسەتكىشتەرىنەن كەيىن قازاقستاندىق سپورتشىلاردىڭ دا كوماندالىق سايىستاردا ۇجىمدىق ويىن كورسەتە الاتىنىنا جانكۇيەرلەر سەنە باستاعان ەدى. الايدا باسكەتبولدان ازيا كۋبوگىنا قاتىسقان ۇلتتىق قۇراما سپورتشىلارى وسى ءبىر جاپ-جاقسى باستامالاردىڭ تاس-تالقانىن شىعاردى.
يندونەزيانىڭ استاناسى – دجاكارتادا ۇيىمداستىرىلعان باسكەتبولدان ەرلەر اراسىنداعى XXX ازيا كۋبوگىندا قازاقستان قۇراماسى جاپونيا, يران جانە سيريا سپورتشىلارىمەن ءبىر توپتا ونەر كورسەتىپ, ءۇش ەلدىڭ ورەندەرىنەن دە ماسقارا بولىپ جەڭىلدى. جەرلەستەرىمىز العاشقى تۋردا 1966 جانە 1971 جىلدارى قۇرلىق چەمپيوناتىندا توپ جارعان جاپونيا باسكەتبولشىلارىمەن كەزدەسىپ, 100:68 (23:22, 22:26, 29:11, 26:9) ەسەبىمەن ۇتىلدى. كۇنشىعىس ەلىنىڭ وكىلدەرى ازيا رەيتينگىندە 7-ءشى, الەمدە 38-ءشى ساتىدا ورنالاسقان بولسا, قازاقستان قۇراماسى سارى قۇرلىقتا 10-شى, الەمدىك رەيتينگتە 68-ورىنعا جايعاسقان.
ولەگ كيسەلەۆ شاكىرتتەرى كەيىنگى تۋردا جاپونيادان الدەقايدا مىقتى, ازيانىڭ تاعى ءبىر الدىڭعى قاتارلى قۇراماسى سانالاتىن يرانمەن شەبەرلىك بايقاستى. ازيا رەيتينگىندە 2-ءشى, الەمدە 23-ورىندا تۇرعان يران باسكەتبولشىلارى دا ءبىزدىڭ سپورتشىلاردى بەت قاراتپاي ۇتتى – 96:60.
جارىس ەرەجەسى بويىنشا ءار توپتا ءبىرىنشى ورىن العان قۇراما تىكەلەي شيرەك فينالعا شىقسا, 2-3-ورىنعا يە بولعان قۇرامالار ءوزارا پلەي-وفف كەزەڭىنىڭ جولداماسىن ساراپقا سالادى. العاشقى ەكى ويىندا ساتسىزدىككە ۇشىراپ, توپتاعى جوعارى ورىنداردان كۇدەر ۇزگەن قازاقستان قۇراماسى جارىستىڭ پلەي-وفف ساتىسىنا شىعۋ ءۇشىن سوڭعى تۋردا قالاي دا سيريا باسكەتبولشىلارىن جەڭۋگە ءتيىس ەدى. ەكى قۇراما وكىلدەرى بىلتىر قاراشا ايىندا 2023 جىلى وتەتىن الەم كۋبوگىنىڭ ءبىرىنشى ىرىكتەۋ كەزەڭىندە كەزدەسىپ, جەرلەستەرىمىز ەكى رەتىندە دە سيريا قۇراماسىن تىزە بۇكتىرگەن-ءدى. قازاقستانداعى العاشقى ويىندا ءبىزدىڭ جىگىتتەر 84:74 ەسەبىمەن باسىم تۇسكەن بولسا, قارىمتا كەزدەسۋدە دە 10 ۇپاي ايىرماشىلىعىمەن جەڭىسكە جەتكەن-ءدى – 71:81.
وكىنىشكە قاراي, پلەي-وفف كەزەڭىنە شىعۋعا مۇمكىندىك بەرەتىن سوڭعى ويىندا رەيتينگتە قازاقستاننان الدەقايدا تومەن ورنالاسقان (ازيادا 15-ءشى, الەمدە 83-ورىندا) سيريا باسكەتبولشىلارى جەرلەستەرىمىزدى سان سوقتىرىپ كەتتى. ءبىرىنشى ون مينۋتتىقتى ءبىزدىڭ جىگىتتەر 26:16 ەسەبىمەن ءوز پايداسىنا اياقتاعانىمەن, كەيىنگى ەكى كەزەڭدە 7:21, 13:24 ناتيجەسىمەن قارسىلاستارىنا جول بەردى. ال سوڭعى, ءتورتىنشى كەزەڭدە وتانداستارىمىز 21:16 ەسەبىمەن باسىم تۇسكەنىمەن, جالپى ەسەپتە 67:77 بولىپ جەڭىلىپ قالدى. ءسويتىپ, سيريا قۇراماسى جارىستىڭ كەلەسى كەزەڭىنە جولداما السا, بىردە-ءبىر ويىندا جەڭىسكە جەتە الماعان قازاقستان سپورتشىلارى ازيا كۋبوگىنداعى باسەكەسىن اياقتادى.
قۇرلىقتىق دودانىڭ تاريحىنا ۇڭىلەر بولساق, قازاقستان قۇراماسى ازيا كۋبوگىنا 1995 جىلدان باستاپ قاتىسىپ كەلەدى. جەرلەستەرىمىز سول جىلى وڭتۇستىك كورەيادا ۇيىمداستىرىلعان العاشقى جارىسىندا ء«ا» دەگەننەن ءتاۋىر ناتيجە كورسەتىپ, ءتۋرنيردى بەسىنشى ورىنمەن تۇيىندەدى. بەسىنشى ورىن ءۇشىن وتكەن باسەكەدە قازاقستان ساۋد ارابياسى قۇراماسىن 95:82 ەسەبىمەن قاپى قالدىرعان-دى. ال 2007 جىلى جاپونيادا وتكەن ازيا كۋبوگىندا تاريحي ناتيجە كورسەتىپ, ءتورتىنشى ورىنعا يە بولدى. قولا جۇلدە ءۇشىن بولعان ويىندا جەرلەستەرىمىز وڭتۇستىك كورەيادان جەڭىلىپ قالدى – 80:76.
باسكەتبولشىلارىمىزدىڭ ازيا كۋبوگى ويىندارىنداعى اۋىز تولتىرىپ ايتارلىقتاي بار جەتىستىگى وسى. وزگە بىرىنشىلىكتەردە قازاقستان قۇراماسىنىڭ ناتيجەسى تىم ناشار بولدى. ەڭ وكىنىشتىسى, 2017 جىلعى جانە بيىلعى دودادا جەرلەستەرىمىز توپتان شىعا الماي, جانكۇيەرلەرى الدىندا ۇياتقا قالدى.
ەندى باسكەتبولدان قازاقستان ەرلەر قۇراماسى 2023 جىلى وتەتىن الەم كۋبوگىنىڭ ەكىنشى ىرىكتەۋ كەزەڭىنە دايىندالادى. العاشقى اينالىمدا D توبىندا ونەر كورسەتىپ, ءوز توبىندا 1-ورىنمەن ىرىكتەۋدىڭ 2-اينالىمىنا جولداما العان جەرلەستەرىمىز ەكىنشى ىرىكتەۋدە باحرەين, يران, اۋستراليا, قىتاي جانە جاپونيا قۇرامالارىمەن جولدامانى ساراپقا سالادى. العاشقى ءۇش ورىنداعى قۇرامالار الەم كۋبوگىنا قاتىسادى. ىرىكتەۋ ويىندارى تامىز, قاراشا جانە 2023 جىلدىڭ اقپانىندا وتەدى دەپ جوسپارلانعان.
باسكەتبولدان 2023 جىلعى الەم كۋبوگى 25 تامىز بەن 10 قىركۇيەك ارالىعىندا بىردەن 3 مەملەكەتتە – يندونەزيا, جاپونيا جانە فيليپپيندە وتەدى. قازاقستان قۇراماسى 2019 جىلى الەم كۋبوگىنىڭ ەكىنشى ىرىكتەۋ كەزەڭىنە وتكەنىمەن, فينالدىق سايىسقا جولداما الا الماعان ەدى.