مىسىردىڭ باس شاھارى – كايردە ءبىر اپتاعا جالعاسقان سەمسەرلەسۋدەن كەزەكتى الەم چەمپيوناتى مارەسىنە جەتتى. دۇنيە ءجۇزىنىڭ ەڭ ۇزدىك دەگەن سپورتشىلارى باق سىناعان جاھاندىق دودادا قازاقستاندىق سپورتشىلار دا جۇلدەگە تالاسىپ كورگەن ەدى. وكىنىشكە قاراي, افريكا قۇرلىعىنا اتتانعان 15 سپورتشىمىزدىڭ بىردە-بىرەۋى جۇلدەگە ىلىنە الماي, قورجىنىمىز تاعى دا بوس قايتتى.
تاعى دا دەپ ەكپىن ءتۇسىرىپ ايتۋىمىزدىڭ سەبەبى, تاۋەلسىزدىك العان جىلدان بەرى الەم چەمپيوناتتارىنا قاتىسىپ كەلە جاتقان قازاقستان قۇراماسى وسى كۇنگە دەيىن بىردە-ءبىر مارتە جۇلدە الا الماي كەلەدى. جەرلەستەرىمىز بيىل دا سول «جەتىستىكتەرىن» قايتالاپ, كايردەن جۇلدەسىز قايتتى.
دەگەنمەن سەمسەرلەسۋشىلەرىمىز مىسىردا جۇلدەگە ىلىكپەسە دە, ەكى سپورتشىمىز شيرەك فينالعا دەيىن جەتىپ, قازاقستان قۇراماسىنىڭ تاريحي جەتىستىگىن تىركەدى. بۇعان دەيىن ەشبىر سپورتشىمىز ىرىكتەۋ كەزەڭىنەن ارىگە اسا الماي كەلگەن ەدى. اتاپ ايتار بولساق, شپاگا سايىسىندا باق سىناعان 2013 جىلعى جازعى ۋنيۆەرسيادا ويىندارىنىڭ كۇمىس مەدال يەگەرى, الەم كۋبوگى مەن بىرنەشە حالىقارالىق جارىستىڭ جۇلدەگەرى رۋسلان قۇربانوۆ الەم چەمپيوناتىنداعى تۇساۋكەسەر كەزدەسۋىندە گەرمانيالىق ليۋك بەللماننان 15:12 ەسەبىمەن باسىم تۇسسە, كەيىنگى اينالىمدا توكيو وليمپياداسىنىڭ قاتىسۋشىسى قىتايلىق لان مينحاونى (15:14), شيرەك فينالدا يسپانيالىق دجەرارد گوسنەللدى (15:8) جارىس جولىنان ىعىستىردى. وكىنىشكە قاراي, جارتىلاي فينالعا جولداما بەرەتىن باسەكەدە جەرلەسىمىز توكيو وليمپياداسىنىڭ چەمپيونى, وسى جارىستىڭ بولاشاق جەڭىمپازى فرانتسيالىق رومەن كاننوننان ەكى ۇپاي ايىرماشىلىعىمەن جەڭىلىپ قالدى – 15:13.
ال ەكىنشى توپتا ونەر كورسەتكەن ازيا بىرىنشىلىگىنىڭ جەڭىمپازى, ازيا ويىندارىنىڭ جۇلدەگەرى ەلمير ءالىمجانوۆ باستاپقى باسەكەلەردە چەحيالىق ميحال چۋپر (15:9) مەن حوسسام ءال كورستى (15:12) جەڭسە, كەيىننەن 2019 جىلعى الەم چەمپيونى, توكيو وليمپياداسىنىڭ كۇمىس جۇلدەگەرى ماجارستاندىق گەرگەي شيكلوشينەن 15:9 ەسەبىمەن ايلاسىن اسىرىپ, شيرەك فينالعا جولداما العان ەدى. الايدا جارتىلاي فينالدا وسى الەم بىرىنشىلىگىنىڭ بولاشاق قولا جۇلدەگەرى بەلگيالىق نەيسسەر لويولاعا ەسە جىبەردى – 15:8.
ەرلەر اراسىنداعى كوماندالىق جارىستا سىنعا تۇسكەن قازاقستان قۇراماسى ەكىنشى اينالىمدا شۆەتسيامەن كەزدەسىپ, 43:39 ەسەبىمەن جەڭىلىپ قالدى. بۇل سىندا فرانتسيا قۇراماسىنىڭ باعى جانىپ, الەم چەمپيوناتىنىڭ التىن جۇلدەسىن جەڭىپ الدى. سونداي-اق ەرلەر مەن ايەلدەر اراسىنداعى جەكەلەي جارىستاردا باق سىناعان وزگە جەرلەستەرىمىز ىرىكتەۋدىڭ ەكىنشى اينالىمىنان اسا العان جوق.
ءبىر اپتاعا جالعاسقان الەم چەمپيوناتىنىڭ جالپىكوماندالىق ەسەبىندە 8 مەدال (4 التىن, 2 كۇمىس, 2 قولا) ولجالاعان فرانتسيا قۇراماسى توپ جاردى. كەيىنگى ورىندارعا وڭتۇستىك كورەيا (3 التىن) جانە يتاليا (2 التىن, 4 كۇمىس, 2 قولا) سپورتشىلارى جايعاستى. ەندى 2023 جىلعى الەم چەمپيوناتىن يتاليانىڭ ميلان قالاسى قابىلدايدى.