وسىدان ءبىر اي بۇرىن مەكسيكادا وتكەن اۋىر اتلەتيكادان جاسوسپىرىمدەر اراسىنداعى الەم چەمپيوناتىندا التىن العان ەدىگە ەمبەردى ەندى, مىنە, سارى قۇرلىق باسەكەسىندە توپ جاردى.
وزبەكستاننىڭ استاناسى – تاشكەنتتە ءوتىپ جاتقان جاستار مەن جاسوسپىرىمدەر اراسىنداعى ازيا چەمپيوناتىنىڭ كەزەكتى كۇنىندە قازاقستان قۇراماسىنىڭ قورجىنى ءبىر التىن, ءبىر قولا جۇلدەمەن تولىقتى. جاسوسپىرىمدەر اراسىنداعى 73 كيلو سالماقتا سىنعا تۇسكەن الەم چەمپيونى ەمبەردى قوسسايىستا 309 (136+173 كيلونى ەڭسەرىپ, ازيا بىرىنشىلىگىنىڭ جەڭىمپازى اتاندى. سونداي-اق ول جۇلقا كوتەرۋ مەن قوسسايىس باسەكەسىندە ازيا رەكوردىن ورناتتى.
ال جاستار ساناتىندا 61 كيلودا ونەر كورسەتكەن ازامات تولەگەن قوسسايىستا 262 كيلونى ەڭسەرىپ, ازيا چەمپيوناتىنىڭ قولا جۇلدەگەرى اتاندى. ايتا كەتەيىك, بۇعان دەيىن ازيا چەمپيوناتىنىڭ جاسوسپىرىمدەر ساناتىندا سىنعا تۇسكەن قازاقستاندىق ەراسىل وماروۆ (55 كگ) تا سارى قۇرلىق بىرىنشىلىگىنىڭ قولا جۇلدەگەرى اتانعان ەدى.