وتكەن دەمالىس كۇندەرى فۋتبولدان رەسەي چەمپيوناتىنىڭ جاڭا ماۋسىمى باستالدى. ءبىرىنشى تۋر ويىندارىنىڭ قورىتىندىسى بويىنشا ماسكەۋدىڭ تسسكا كلۋبىندا ونەر كورسەتەتىن قازاقستاندىق فۋتبولشى باقتيەر زاينۋتدينوۆ العاشقى تۋردىڭ شارتتى قۇرامىنا ەندى.
تسسكا جاڭا ماۋسىمنىڭ العاشقى ويىنىندا ەكاتەرينبۋرگتىڭ «ۋرال» كومانداسىن قابىلداپ, ءوز الاڭىندا 2:0 ەسەبىمەن جەڭىسكە جەتتى. بۇل ماتچتا قازاقستان ۇلتتىق قۇراماسىنىڭ وكىلى جاسىل الاڭدا 90 مينۋت بويى ويناپ, كومانداسىنىڭ جەڭىسكە جەتۋىنە سۇبەلى ۇلەس قوستى. WhoScored ينتەرنەت-پورتالى وتانداسىمىزدىڭ العاشقى تۋرداعى ويىنىن جوعارى باعالاپ, وعان 7,9 ۇپاي بەردى. وسى ناتيجەسىنىڭ ارقاسىندا ول تاڭداۋلى فۋتبولشىلار عانا ەنەتىن تۋردىڭ شارتتى قۇرامىنان تابىلدى. ايتا كەتەيىك, ادەتتە جارتىلاي قورعانىستا جانە شابۋىلدا وينايتىن باقتيەر زاينۋتدينوۆ بۇل ماتچتا ورتالىق قورعاۋشىنىڭ قىزمەتىن اتقاردى.
سونداي-اق ۇلتتىق قۇرامانىڭ تاعى ءبىر ويىنشىسى ءنۇرالى ءالىپ وينايتىن سانكت-پەتەربۋرگتىڭ «زەنيت» كلۋبى ءبىرىنشى تۋردا «حيمكيمەن» تەڭ ءتۇستى – 1:1. الايدا بۇل ماتچتا وتانداسىمىز قوسالقى قۇرامدا قالىپ قويدى.