كاسىبي تەننيسشىلەر (ATP) مەن ايەلدەر تەننيسى قاۋىمداستىعى (WTA) «ۇلكەن دۋلىعا» ساناتىنا ەنەتىن «ۋيمبلدون» جارىسىنان كەيىنگى تەننيسشىلەردىڭ رەيتينگىن جاريالادى.
«ۋيمبلدون» باسەكەسىندە سپورتشىلارعا ۇپاي بەرىلمەگەندىكتەن, جاڭارعان رەيتينگتە اسا قاتتى وزگەرىس بولا قويعان جوق. ماسەلەن, بيىلعى تۋرنيردە توپ جارعان وتانداسىمىز ەلەنا رىباكينا 23-ورنىن ساقتاپ قالدى. ال بۋداپەشتتەگى جارىستىڭ جارتىلاي فينالىنا دەيىن جەتكەن يۋليا پۋتينتسەۆا 39-شى, جاراقاتىنا بايلانىستى بيىلعى ماۋسىمدى ەرتە اياقتاعان زارينا دياس 243-ساتىدا تۇر. جۇپتىق سىندا قازاقستاننىڭ ءبىرىنشى راكەتكاسى اننا دانيلينا 19-ورىنعا كوتەرىلدى.
ەرلەر اراسىنداعى ەلىمىزدىڭ ءبىرىنشى راكەتكاسى الەكساندر بۋبليك ءۇش ساتى جوعارىلاپ, 39-ورىنعا جايعاستى. دميتري پوپكو 194-ءشى, ميحايل كۋكۋشكين 204-ءشى, تيموفەي سكاتوۆ 211-ءشى, دەنيس ەۆسەەۆ 338-ورىندا تۇر. ال جۋىردا عانا ەلورداداعى جارىستىڭ فينالىندا ويناعان بەيبىت جۇقاەۆ 473-ساتىدان 447-ورىنعا كوتەرىلدى.