اقش-تىڭ الاباما شتاتىنىڭ بيرمينگەم قالاسىندا ۇيىمداستىرىلعان XI دۇنيەجۇزىلىك ويىندار مارەسىنە جەتتى. مۇحيتتىڭ ارعى بەتىندە وتكەن حالىقارالىق دودادا قازاقستان قۇراماسى سپورتتىڭ سەگىز تۇرىنەن سىنعا ءتۇسىپ, بارلىعى 4 مەدال (1 التىن, 2 كۇمىس, 1 قولا) جەڭىپ الدى. ناتيجەسىندە, قازاقستان دەلەگاتسياسى پورتۋگاليامەن بىردەي كورسەتكىشكە يە بولىپ, جالپىكوماندالىق ەسەپتە 37-ساتىعا تۇراقتادى. اقش-تا بارلىعى 73 ەلدىڭ سپورتشىلارى جۇلدەگە قول جەتكىزدى.
دۇنيەجۇزىلىك ويىنداردا ەل نامىسىن قورعاعان 16 سپورتشىمىز ناشار ناتيجە كورسەتتى دەپ ايتا المايمىز. اقش تورىندەگى دودادا قازاقستان قورجىنىنا التىن مەدالدى كاراتەدەن توكيو وليمپياداسىنىڭ قولا جۇلدەگەرى سوفيا بەرۋلتسەۆا سالدى. جارىستىڭ ەكىنشى كۇنىندە سىنعا تۇسكەن وتانداسىمىز ءوز سالماعىندا قارسىلاس شاق كەلتىرگەن جوق. ال دجيۋ-دجيتسۋدىڭ نەۆازا تۇرىنەن سىنعا تۇسكەن گالينا دۋۆانوۆا مەن مۋاي-تايدان 2 دۇركىن الەم چەمپيونى الماز سارسەمبەكوۆ فينالدا ءسۇرىنىپ, جارىستىڭ كۇمىس جۇلدەگەرلەرى اتاندى. سونداي-اق سپورتتىق اكروباتيكادان دانيەل ديل مەن ۆاديم شۋليار جۇبى ۇزدىك ۇشتىكتى تۇيىندەدى.
سپورتتى دامىتۋ ديرەكتسياسىنىڭ دەرەگى بويىنشا, قازاقستان قۇراماسى دۇنيەجۇزىلىك ويىندارعا 1993 جىلدان بەرى قاتىسا باستاعان. سول جىلى نيدەرلاند كورولدىگىنىڭ گااگا قالاسىندا وتكەن دودادا جەرلەستەرىمىز سپورتتىڭ 20 تۇرىنەن باق سىناپ, 1 التىن, 1 كۇمىس پەن 1 قولا مەدال جەڭىپ الدى. ال ەڭ كەيىنگى رەت 2017 جىلى ۆروتسلاۆ قالاسىندا (پولشا) وتكەن ويىنداردا ونەر كورسەتىپ, جەرلەستەرىمىز 27 سپورت تۇرىنەن 1 التىن, 5 كۇمىس جانە 2 قولا مەدال ەنشىلەگەن ەدى. بيرمينگەم ويىندارى جۇلدە سانى مەن ساپاسى جاعىنان 2-ورىنعا شىقتى.
ەستەرىڭىزگە سالا كەتەيىك, بيرمينگەمدە الەمنىڭ ءار ەلىنەن كەلگەن 3500-دەن استام اتلەت 34 سپورت تۇرىنەن 223 مەدال جيىنتىعىن ساراپقا سالدى. سونىڭ ىشىندە قازاقستاندىق سپورتشىلار 8 سپورت ءتۇرى – كيكبوكسينگ, ساداق اتۋ, مۋاي-تاي, دجيۋ-دجيتسۋ, سپورتتىق اكروباتيكا, برەيكينگ, WKF كاراتەدەن جۇلدەگە تالاستى.
دۇنيەجۇزىلىك ويىندار 1981 جىلدان باستاپ ءار 4 جىلدا ءبىر رەت, وليمپيا ويىندارىنان كەيىنگى جىلى ۇيىمداستىرىلادى. دۇنيەجۇزىلىك ويىندار 2001 جىلدان باستاپ حالىقارالىق وليمپيادا كوميتەتىنىڭ قول استىنا كوشتى. اۋەلى تەك وليمپيادا باعدارلاماسىنا كىرمەيتىن سپورت تۇرلەرىنەن وتكىزىلسە, بەرتىن كەلە 4 جىلدىقتىڭ باستى باسەكەسىندەگى سپورت تۇرلەرى قوسىلدى. ماسەلەن, بيرمينگەمدە كوركەم گيمناستيكا, ساداق اتۋ, قۇزعا ورمەلەۋ سىندى وليمپيادالىق سپورت تۇرلەرىنەن جۇلدەلەر ساراپقا سالىنادى. ال دۇنيەجۇزىلىك ويىنداردا لاكروسس, كانوە-مارافون, درون جارىستىرۋ, كيكبوكسينگ, برەيك-دانس, پاركۋر مەن ارقان تارتىس سەكىلدى سپورت تۇرلەرىنەن العاش رەت جارىس وتەدى.