قازاقستاندىق ەركىن كۇرەس شەبەرلەرى تۋنيستە ۇيىمداستىرىلعان رەيتينگتىك تۋرنيردەن تابىستى ورالدى. كۇزدە سەربيا استاناسى – بەلگرادتا جالاۋى جەلبىرەيتىن الەم چەمپيوناتىنا قاتىسۋعا مۇمكىندىك بەرەتىن ەڭ سوڭعى ۇپايلار ۇلەستىرەتىن جارىستا جەرلەستەرىمىز جەتى مەدال (2 التىن, 3 كۇمىس, 2 قولا) ولجالاپ, جالپىكوماندالىق ەسەپتە ءتورتىنشى ورىنعا يە بولدى. تۋنيس بوزكىلەمىندە الەمنىڭ 17 ەلىنەن كەلگەن 140-قا جۋىق بالۋان باق سىنادى.
افريكا قۇرلىعىندا وتكەن بىلەكتى بالۋاندار باسەكەسىندە قازاقستان ۇلتتىق قۇراماسىنىڭ 11 سپورتشىسى ونەر كورسەتتى. اتاپ ايتقاندا, 60 كيلودا جاستار اراسىنداعى بىلتىرعى الەم بىرىنشىلىگىنىڭ قولا جۇلدەگەرى اسىلجان ەسەنگەلدى, 65 كيلودا الەم جانە ازيا بىرىنشىلىكتەرىنىڭ جۇلدەگەرى ادلان اسقاروۆ, 70 كيلو سالماقتا 2021 جىلعى ازيا چەمپيونى تالعات سىرباز جانە بىلتىرعى ەل بىرىنشىلىگىنىڭ جەڭىمپازى سانجار دوسجانوۆ, 79 كيلودا جۋىردا عانا الماتىدا وتكەن بولات تۇرلىحانوۆتى ەسكە تۇسىرۋگە ارنالعان تۋرنيردە توپ جارعان بولات ساقاەۆ, 86 كيلودا ازيا چەمپيونى ازامات داۋلەتبەكوۆ, 92 كيلودا ەل چەمپيوناتىنىڭ جۇلدەگەرى ءابدىماناپ بايگەنجەەۆ, 97 كيلودا ازيا چەمپيوناتىنىڭ قولا جۇلدەگەرى مامەد يبراگيموۆ پەن ەل بىرىنشىلىگىنىڭ كۇمىس مەدال يەگەرى سەرىك باقىتحانوۆ, اسا اۋىر سالماقتا (125 كگ) ەلىمىزدىڭ ەڭ ۇزدىك بالۋاندارى الىشەر ەرعالي مەن يۋسۋپ باتىرمۋرزاەۆ ەل نامىسىن قورعادى.
دەگەنمەن اتالعان بالۋانداردىڭ اراسىندا تەك جەتى سپورتشىمىزعا عانا جۇلدەگەرلەر قاتارىنان كورىنۋ باقىتى بۇيىردى. ماسەلەن, 86 كيلو سالماقتا بەلدەسكەن ازامات داۋلەتبەكوۆ پەن 92 كيلودا كۇرەسكەن ءابدىماناپ بايگەنجەەۆ تۋرنير چەمپيونى اتاندى. ازامات جارتىلاي فينالدا بيىلعى ەۋروپا چەمپيوناتىنىڭ قولا جۇلدەگەرى تۇركيالىق وسمان گيوچەننەن باسىم تۇسسە, فينالدا بوزكىلەم يەسى تۋنيستىك سابري مناسريادان ايلاسىن اسىرىپ, التىننان القا تاقتى. ال ءا.بايگەنجەەۆ العاشقى اينالىمدا جاستار اراسىنداعى الەم چەمپيوناتىنىڭ كۇمىس جۇلدەگەرى تۋنيستىك يمەد كادديديدى 4:3 ەسەبىمەن تىزە بۇكتىرسە, ەكىنشى اينالىمدا موڭعوليادا ۇيىمداستىرىلعان بيىلعى ازيا بىرىنشىلىگىندە ءۇشىنشى ورىنعا تابان تىرەگەن ۇندىستاندىق ۆيكي ۆيكيدىڭ جاۋىرىنىن جەر يىسكەتتى. فينالدىق بەلدەسۋدە تاعى ءبىر تۋنيس بالۋانى چيحەب ەدديندى ايقىن باسىمدىقپەن جەڭىپ (10:4), افريكادا ءانۇرانىمىزدى شىرقاتتى.
وكىنىشكە قاراي, ءۇش بالۋانىمىز باس جۇلدەگە سىنىق سۇيەم قالعاندا ءسۇرىندى. 70 كيلو سالماقتا بەلدەسكەن تالعات سىرباز فينالدا 25 جاستاعى امەريكالىق زەين رەتەرفوردكە ەسە جىبەرسە, بولات ساقاەۆ (79 كگ) يراندىق بالۋان موحامماد ءنوحوديدىڭ وسال تۇسىن تابا المادى. ال 97 كيلودا ونەر كورسەتكەن مامەد يبراگيموۆ فينالدا امەريكالىق داڭقتى بالۋان كايل سنايدەردەن جەڭىلدى. سنايدەر – 2016 جىلعى ريو وليمپياداسىنىڭ چەمپيونى, توكيو وليمپياداسىنىڭ كۇمىس جۇلدەگەرى. سونداي-اق ول ەكى مارتە الەم چەمپيوناتتارىندا دارا شىققان ساقا بالۋان.
سونىمەن قاتار ادلان اسقاروۆ (65 كگ) پەن الىشەر ەرعالي (125 كگ) تۋنيستەگى ءتۋرنيردىڭ قولا جۇلدەگەرى اتاندى. ءبىر قىزىعى, اسا اۋىر سالماقتاعى ءۇشىنشى ورىن ءۇشىن وتكەن بەلدەسۋدە الىشەر ەرعالي مەن يۋسۋپ باتىرمۋرزاەۆ شەبەرلىك بايقاسىپ, العاشقىسى الىمدى بولدى.
وزگە سالماقتارداعى چەمپيوندارعا توقتالار بولساق, 57 جانە 61 كيلودا اقش بالۋاندارى توماس گيلمان مەن سەت گروسس جەڭىسكە جەتسە, 65 كيلودا ۇندىستاندىق سيۋدجەت سيۋدجەت, 74 كيلودا يراندىق يۋنەس ەمامي جانە اسا اۋىر سالماقتا گرۋزيالىق گەنو پەترياشۆيلي توپ جاردى.
كۇرەس تۇرلەرىنەن بيىلعى الەم چەمپيوناتى قىركۇيەكتىڭ 10-18 ارالىعىندا سەربيادا وتەدى.