اقش-تىڭ نيۋپورت قالاسىندا ۇيىمداستىرىلعان تەننيستەن ATP 250 ءتۋرنيرىنىڭ فينالىنا شىققان قازاقستاننىڭ ءبىرىنشى, الەمنىڭ 42-راكەتكاسى الەكساندر بۋبليك باس جۇلدە ءۇشىن وتكەن باسەكەدە جەڭىلىپ قالدى.
قازاقستاندىق تەننيسشى وسىعان دەيىن بەس رەت ATP دودالارىنىڭ فينالىندا ويناپ, تەك سونىڭ بىرەۋىندە عانا, بيىلعى مونپەلەدەگى تۋرنيردە چەمپيون اتانعان ەدى. بۇل جولعى فينالدا ا.بۋبليك الەمنىڭ 41-راكەتكاسى امەريكالىق ماكسيم كرەسسيمەن باس جۇلدەنى ساراپقا سالدى. ءبىرىنشى پارتيا بارىسىندا قوس برەيك جاساعان قازاقستاندىق تەننيسشى باسىم بولدى – 6:2. ەكىنشى سەتتە دە وتانداسىمىز 3:0 ەسەبىمەن العا كەتكەنىمەن, قاتارىنان التى گەيمدە قارسىلاسىنا ەسە جىبەرىپ, 3:6 ناتيجەسىمەن جەڭىلىپ قالدى. ال ءۇشىنشى, شەشۋشى پارتيادا ماتچ تاعدىرى تاي-برەيكتە شەشىلىپ, بۇل جەردە امەريكالىق تەننيسشى جەڭىسكە جەتتى – 7:6 (7:3).
سونداي-اق ەلورداداعى ITF ساناتىنا ەنەتىن ەرلەر اراسىندا M25 ءتۋرنيرىنىڭ فينالىندا ويناعان وتانداسىمىز بەيبىت جۇقاەۆ تا باس جۇلدەگە سىنىق سۇيەم قالعاندا ءسۇرىندى. فينالدا الەمنىڭ 408-ءشى, وسى جارىستىڭ 5-راكەتكاسى رەتىندە تىركەلگەن وزبەكستاندىق سەرگەي فومين وتانداسىمىزدى ءۇش سەتتە (6:4, 2:6, 6:4) قاپى قالدىرىپ, جارىس جەڭىمپازى اتاندى.