بۇل كۇندەرى فۋتبولدان ەل چەمپيوناتىنىڭ جوعارى جانە ءبىرىنشى ليگاسىندا ونەر كورسەتەتىن 16 كوماندا ءتورت-تورتتەن ءتورت توپقا ءبولىنىپ, قازاقستان كۋبوگىن ساراپقا سالۋدا. وتكەن دەمالىس كۇندەرى كۋبوك جولىنداعى جارىستىڭ توپتىق كەزەڭدەگى ەكىنشى تۋر ويىندارى ءوز مارەسىنە جەتتى. ەلىمىزدىڭ سەگىز قالاسىندا وتكەن ماتچتاردا بىرنەشە توسىن ناتيجە تىركەلدى.
«ا» توبىندا ونەر كورسەتەتىن بىلتىرعى ەل كۋبوگىنىڭ يەگەرى «قايرات» سىرت الاڭدا «اتىراۋمەن» كەزدەسىپ, اسا تارتىستى وتكەن كەزدەسۋدە 3:2 ەسەبىمەن جەڭىسكە جەتتى. الماتىلىقتار ءبىرىنشى تۋردا شىمكەنتتىڭ «ورداباسى» كومانداسىن جەڭسە (2:0), «اتىراۋ» سىرت الاڭدا پاۆلوداردىڭ «اقسۋىن» ۇتقان بولاتىن – 1:0.
توپتاعى ەكىنشى ويىندا «ورداباسى» شىمكەنتتە «اقسۋدان» باسىم ءتۇستى 2:0. ءبىرىنشى تۋرداعى ساتسىزدىكتەن كەيىن ەكى كلۋب تا بۇل ماتچتا جەڭىس ءۇشىن بارىن سالدى. دەگەنمەن ءبىرىنشى تايمدا ۇستەمدىك تانىتقان الاڭ قوجايىندارى ماتچ تاعدىرىن العاشقى 45 مينۋتتىڭ ىشىندە شەشىپ تاستادى. ەكى تۋردىڭ قورىتىندىسى بويىنشا «قايرات» التى ۇپايمەن جەكە-دارا كوش باستادى. ءۇش ۇپايى بار «اتىراۋ» مەن «ورداباسى» ەكىنشى جانە ءۇشىنشى ورىنداردى ءبولىسىپ تۇر. «اقسۋ» ءتورتىنشى ورىندا قالىپ قويدى.
ەكىنشى تۋردىڭ سەنساتسياسىن ءبىرىنشى ليگادا ونەر كورسەتەتىن «قايسار» كومانداسى تىركەدى. «ۆ» توبىندا سىنعا ءتۇسىپ جاتقان قىزىلوردالىق ۇجىم بۇل تۋردا بىرەر كۇننەن سوڭ كونفەرەنتسيا ليگاسىندا وينايتىن پەتروپاۆلدىڭ «قىزىلجارىن» سىرت الاڭدا قاپى قالدىردى. «قاراساي باتىر» ستاديونىندا وتكەن ماتچتا 2:1 ەسەبى تىركەلدى. ەكى ويىندا التى ۇپاي ولجالاعان «قايسار» «ۆ» توبىنىڭ كوشىن باستادى. ال «قىزىلجار» ءبىر ۇپايمەن ءۇشىنشى ورىندى قاناعات تۇتۋدا.
سونداي-اق العاشقى تۋردا «قايساردان» جەڭىلگەن ورالدىڭ «اقجايىعى» ەكىنشى تۋردا «كاسپيدى» تىزە بۇكتىردى – 3:1. ءۇش ۇپايىنا قول جەتكىزگەن «اقجايىق» تۋرنير كەستەسىندە ەكىنشى ورىنعا كوتەرىلسە, «كاسپي» ءبىر ۇپايمەن سوڭعى ورىندا قالىپ قويدى.
«س» توبىندا ونەر كورسەتەتىن قوستانايدىڭ «توبىلى» ەكىنشى تۋردان كەيىن العاشقى ۇپايىنا قول جەتكىزدى. ءبىرىنشى تۋردا قوستانايلىقتار سىرت الاڭدا «تارازدان» 5:1 ەسەبىمەن وڭباي جەڭىلگەن ەدى. ارينە, بۇل كەزدەسۋدە «توبىلدىڭ» نەگىزگى قۇرام فۋتبولشىلارى ەمەس, جاستار كومانداسى ويناعان بولاتىن. ال ەكىنشى تۋردا «اقتوبەمەن» بولعان ماتچتا قوسالقى قۇرام ويىنشىلارىن شىعارىپ, 2:1 ەسەبىمەن جەڭىسكە جەتتى. ەكى تۋردان كەيىن ميلان ميلانوۆيچ شاكىرتتەرى ءۇش ۇپايمەن ءۇشىنشى ورىنعا جايعاستى. ال بىردە-ءبىر ۇپايى جوق «اقتوبە» سوڭعى ورىنعا ءتۇسىپ قالدى.
توپتاعى ەكىنشى ويىنىندا «تاراز» ءوز الاڭىندا «ماقتاارالعا» ەش مۇمكىندىك قالدىرمادى. العاشقى تۋردا «اقتوبەدەن» باسىم تۇسكەن «ماقتاارال» فۋتبولشىلارى بۇل تۋردا «تارازدىڭ» وسال تۇسىن تابا المادى. قوناقتار ءبىرىنشى تايمدا الاڭ يەلەرىنە لايىقتى قارسىلىق كورسەتىپ, 2:2 ەسەبىمەن تەڭ ويناعانىمەن, ەكىنشى تايمدا سول ناتيجەنى ساقتاپ قالۋعا شامالارى جەتپەدى. التى گول سوعىلعان ماتچتا «تاراز» 4:2 ەسەبىمەن جەڭىسكە جەتتى. وسىلايشا, ەكى ويىندا التى ۇپاي جيناعان «تاراز» «س» توبىندا توپ باستادى. «ماقتاارال» ءۇش ۇپايمەن ەكىنشى ورىندا قالا بەرەدى.
«د» توبىنىڭ ەكىنشى تۋرىندا «استانا» قاراعاندىنىڭ «شاحتەرىمەن» كەزدەستى. «استانا ارەنادا» وتكەن ويىندا جانكۇيەرلەر جەتى گولدىڭ كۋاسى بولدى. 5:2 ەسەبىمەن جەڭىسكە جەتكەن ەلوردالىق ۇجىم ءتورت ۇپايمەن ءبىرىنشى ورىنعا كوتەرىلدى. «استانا» العاشقى تۋردا سىرت الاڭدا «جەتىسۋمەن» تەڭ ويناپ (0:0), «شاحتەر» ءوز الاڭىندا «تۇراندى» 4:0 ەسەبىمەن تىزە بۇكتىرگەن ەدى.
«تۇران» ءبىرىنشى تۋرداعى ءىرى جەڭىلىسىنىڭ ەسەسىن «جەتىسۋمەن» بولعان ويىندا قايتاردى. 16-مينۋتتا تۇركىستاندىق كوماندانىڭ ماكەدونيالىق شابۋىلشىسى سامير فازلي ەسەپتى اشسا, 24-مينۋتتا تابلوداعى كورسەتكىشتى 2:0-گە جەتكىزدى. ال ەكىنشى تايمنىڭ ورتا تۇسىندا ويىنداعى ءۇشىنشى گولىن سوعىپ, حەت-تريكتىڭ اۆتورى اتاندى. قورىتىندى ەسەپ – 3:0. بۇل جەڭىستەن كەيىن «تۇران» تۋرنير كەستەسىندە ءۇشىنشى ورىنعا كوتەرىلىپ, ءبىر ۇپايى بار «جەتىسۋ» ازىرگە ءتورتىنشى ورىندى قاناعات تۇتۋدا.