فرانتسيا تاس جولدارىندا ءوتىپ جاتقان «تۋر دە فرانس» ۆەلوجارىسىنىڭ 14-ءشى كەزەڭى اۋستراليالىق مايكل مەتتيۋستىڭ جەڭىسىمەن اياقتالدى.
Team BikeExchange – Jayco كومانداسىنىڭ ۆەلوشاباندوزى مايكل مەتتيۋس سەنت-ەتەن – ماند قالالارىن جالعاعان 192,5 شاقىرىمدىق جولدى 4 ساعات 30 مينۋت 53 سەكۋندتا ءجۇرىپ ءوتتى. ەكىنشى جانە ءۇشىنشى ورىنعا يتاليالىق البەرتو بەتتيول (EF Education-EasyPost) مەن فرانتسيالىق تيبو پينو (Groupama – FDJ) يە بولدى. ولار مارە سىزىعىن جەڭىمپازدان 15 جانە 34 سەكۋند كەيىن كەستى. بۇل كەزەڭدە «استانا» كاپيتانى الەكسەي لۋتسەنكو مارەگە 34-ءشى بولىپ جەتتى.
14 كەزەڭنىڭ قورىتىندىسى بويىنشا, جالپى ەسەپتە دانيالىق يوناس ۆينگەگور (Jumbo – Visma) كوش باستاپ تۇر. ونى كەيىنگى ءتورت جىلداعى «تۋر دە فرانستىڭ» جەڭىمپازدارى سلوۆەنيالىق تادەي پوگاچار (UAE Team Emirates) مەن بريتانيالىق گەراينت توماس (INEOS Grenadiers) وكشەلەپ كەلەدى. ال الەكسەي لۋتسەنكو ۇزدىك وندىقتىڭ قاتارىنان شىعىپ قالدى. قازىرگى تاڭدا ول 12-ورىندا تۇر.