تەننيستەن قازاقستاننىڭ ءبىرىنشى, الەمنىڭ 42-راكەتكاسى الەكساندر بۋبليك اقش-تىڭ نيۋپورت قالاسىندا ءوتىپ جاتقان ATP 250 ءتۋرنيرىنىڭ فينالىنا شىقتى.
جۇلدە قورى 595 مىڭ اقش دوللارىنا جۋىقتايتىن جارىستىڭ جارتىلاي فينالىندا جەرلەسىمىز دۇنيەجۇزىلىك رەيتينگتە 102-ورىندا تۇرعان اۋستراليالىق دجەيسون كۋبلەرمەن كۇش سىناستى. ەكى پارتياعا جالعاسقان ويىندا قازاقستاندىق تەننيسشى قارسىلاسىن 6:3, 6:2 ەسەبىمەن تىزە بۇكتىردى. ەندى ا.بۋبليك فينالدا رەيتينگتە وزىنەن ءبىر ساتى جوعارى تۇرعان امەريكالىق ماكسيم كرەسسيمەن باس جۇلدەنى ساراپقا سالادى. سونداي-اق بەيبىت جۇقاەۆ تا ەلوردادا ITF سەرياسى بويىنشا ءوتىپ جاتقان M25 ءتۋرنيرىنىڭ فينالىنا شىقتى. جەرلەسىمىز فينالدا وزبەكستاندىق سەرگەي فومينمەن كۇش سىناسادى.
وكىنىشكە قاراي, ايەلدەر اراسىنداعى الەمنىڭ 32-راكەتكاسى قازاقستاندىق يۋليا پۋتينتسەۆا ماجارستاننىڭ باس شاھارى – بۋداپەشتتە وتكەن WTA 250 ءتۋرنيرىنىڭ فينالىنا شىعا المادى. بىلتىر ءدال وسى بۋداپەشت كورتتارىندا ۇيىمداستىرىلعان جارىستا توپ جارعان يۋليا پۋتينتسەۆا بيىل اتاعىن قورعاي المادى. ءتۋرنيردىڭ جارتىلاي فينالىندا ول الەمنىڭ 105-راكەتكاسى سەربيالىق الەكساندرا كرۋنيچتەن ەكى سەتتە جەڭىلىپ قالدى – 6:2, 6:2.