بۇل كۇندەرى اقش-تىڭ الاباما شتاتىنداعى بيرمينگەم قالاسىندا ءار ءتورت جىل سايىن ۇيىمداستىرىلاتىن ءداستۇرلى XI دۇنيەجۇزىلىك ويىندار جارىسى ءوتىپ جاتىر. تورتكۇل دۇنيەنىڭ بىرنەشە ەلىنەن كەلگەن 3500-دەن استام اتلەت سپورتتىڭ 34 تۇرىنەن 223 مەدال جيىنتىعىن ساراپقا سالادى. ولاردىڭ قاتارىندا قازاقستان قۇراماسىنىڭ سپورتشىلارى دا بار. اقش-قا اتتانعان 16 سپورتشىمىز جارىس باعدارلاماسىنا ەنگەن سپورتتىڭ 8 تۇرىنەن سىنعا تۇسۋدە.
وتكەن اپتادا مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ توراعاسى سامات ەرعاليەۆ, سپورتتى دامىتۋ ديرەكتسياسىنىڭ ديرەكتورى ماراتبەك مىقتىبەكوۆ دۇنيەجۇزىلىك ويىندارىنا قاتىساتىن قازاقستان دەلەگاتسياسىن شىعارىپ سالۋ راسىمىنە قاتىستى. ءىس-شارادا سامات ەرعاليەۆ كيكبوكسينگتەن الەم چەمپيونى شىڭعىسحان تلەمىسوۆكە مەملەكەتتىك تۋدى تابىستاپ, ەل نامىسىن قورعايتىن بارلىق سپورتشىعا ساتتىلىك تىلەدى.
«سىزدەر مۇحيتتىڭ ار جاعىندا وتەتىن جارىستا قازاقستاننىڭ كوك تۋىن بيىكتە جەلبىرەتەسىزدەر دەپ سەنەمىن. سىزدەردىڭ ءار جەڭىسىڭىز جانكۇيەرلەرگە زور قۋانىش سىيلايدى. ارالارىڭىزدا دۇنيەجۇزىلىك ويىندارعا بىرنەشە رەت قاتىسقان سپورتشى بار. سوندىقتان ءبىز سىزدەرگە زور سەنىم ارتامىز», دەدى س.ەرعاليەۆ.
سپورتتى دامىتۋ ديرەكتسياسىنىڭ ءباسپاسوز قىزمەتى تاراتقان اقپارات بويىنشا, اقش-تا جالاۋى جەلبىرەگەن الەمدىك دوداعا ەل قۇراماسىنىڭ سپورتشىلارى كيكبوكسينگ, ساداق اتۋ, مۋاي-تاي, دجيۋ-دجيتسۋ, سپورتتىق اكروباتيكا, برەيكينگ جانە WKF كاراتەدەن جۇلدەلەردى ساراپقا سالىپ جاتىر. جارىستىڭ العاشقى اپتاسى اياقتالماي جاتىپ جەرلەستەرىمىز العاشقى التىنىن ولجالاپ ۇلگەردى.
كاراتەشىلەر باسەكەسىندە سىنعا تۇسكەن بىلتىرعى توكيو وليمپياداسىنىڭ قولا جۇلدەگەرى قازاقستاندىق سوفيا بەرۋلتسەۆا بارلىق قارسىلاسىن قوعاداي جاپىرىپ, 68 كيلو سالماقتا دۇنيەجۇزى ويىندارىنىڭ چەمپيونى اتاندى. جارىس بارىسىندا وتانداسىمىز بەس جەكپە-جەك وتكىزىپ, تورتەۋىندە جەڭىسكە جەتتى. تەك ءبىر كەزدەسۋىندە عانا قارسىلاسىمەن تەڭ ءتۇستى. اتاپ ايتار بولساق, س.بەرۋلتسەۆا العاشقى باسەكەسىندە كاراتەدەن بىلتىرعى الەم چەمپيونى يسپانيالىق ماريا توررەس گارسياپەن تەڭ تۇسسە (7:7), كەيىنگى كەزەڭدەردە امەريكالىق سيررۋس لينگلدى (1:4), چەحيالىق جانە تۋنيستىك قارسىلاسىن (3:1) جەڭدى. ال باس جۇلدە ءۇشىن وتكەن فينالدىق باسەكەدە سوفيا بەرۋلتسەۆانىڭ جولى العاشقى اينالىمداعى قارسىلاسى ماريا توررەس گارسيامەن قايتا ءتۇسىپ, بۇل جولعى باسەكەدە جەرلەسىمىز ايقىن باسىمدىقپەن جەڭىسكە جەتتى – 7:1. وسى التىن مەدالدىڭ ارقاسىندا قازاقستان قۇراماسى جالپىكوماندالىق ەسەپتە التىن العان 14 ەلدىڭ قاتارىنا قوسىلدى.
وكىنىشكە قاراي, ەرلەر اراسىنداعى سايىستا قازاقستان قۇراماسىنىڭ كوشباسشىسى, توكيو وليمپياداسىنىڭ قولا جۇلدەگەرى دارحان ءاسادىلوۆ جۇلدەلى ورىننان كورىنە المادى. 67 كيلو سالماقتا سىنعا تۇسكەن وتانداسىمىز العاشقى ايقاسىندا الجيرلىك قارسىلاسىن 5:2 ەسەبىمەن جەڭگەنىمەن, ەكىنشى كەزدەسۋىندە يتاليالىق سپورتشىسىمەن تەڭ ءتۇسىپ, سوڭعى جەكپە-جەگىندە امەريكالىق سپورتشىدان 0:3 ەسەبىمەن جەڭىلىپ قالدى.
ايتا كەتەيىك, دۇنيەجۇزىلىك ويىندار 1981 جىلدان باستاپ ءار ءتورت جىلدا ءبىر رەت, وليمپيا ويىندارىنان كەيىنگى جىلى ۇيىمداستىرىلىپ كەلەدى. دۇنيەجۇزىلىك ويىندار 2001 جىلدان باستاپ حالىقارالىق وليمپيادا كوميتەتىنىڭ قول استىنا كوشتى. اۋەلى بۇل سپورتتىق جارىس تەك وليمپيادا باعدارلاماسىنا ەنبەيتىن سپورت تۇرلەرىنەن وتكىزىلسە, بەرتىن كەلە 4 جىلدىقتىڭ باستى باسەكەسىندەگى سپورت تۇرلەرى دە قوسىلا باستادى. ماسەلەن, بيرمينگەمدە كوركەم گيمناستيكا, ساداق اتۋ, شىڭعا ورمەلەۋ سىندى وليمپيادالىق سپورت تۇرىنەن جۇلدە ساراپقا سالىنىپ جاتىر. ال لاكروسس, كانوە-مارافون, درون جارىستىرۋ, كيكبوكسينگ, برەيك-دانس, پاركۋر مەن ارقان تارتىس سەكىلدى سپورت تۇرلەرى بيىل العاش رەت دۇنيەجۇزىلىك ويىنداردىڭ باعدارلاماسىنا ەنگىزىلدى.