ورتالىق سايلاۋ كوميسسياسى وتىرىسىندا اباي, جەتىسۋ جانە ۇلىتاۋ وبلىستارىنان پارلامەنت سەناتى دەپۋتاتتارىنىڭ سايلاۋىن ۇيىمداستىرۋ جانە وتكىزۋ ماسەلەلەرى قارالىپ, ەرەجەلەرى ناقتىلاندى, دەپ حابارلايدى Egemen.kz وسك ءباسپاسوز قىزمەتىنە سىلتەمە جاساپ.
وتىرىس بارىسىندا سايلاۋعا دايىندىق جانە ونى وتكىزۋ جونىندەگى نەگىزگى ءىس-شارالاردىڭ كۇنتىزبەلىك جوسپارىن بەكىتۋ, سايلاۋ قۇجاتتارىنىڭ كەيبىر نىساندارىن بەكىتۋ, دەپۋتاتتىققا كانديداتتىڭ رەسپۋبليكالىق بيۋدجەت قاراجاتىنان جابىلاتىن شىعىستارىنىڭ مولشەرلەرىن بەلگىلەۋ ماسەلەلەرى زەردەلەندى.
وسك توراعاسى نۇرلان ءابدىروۆ كونستيتۋتسياعا سايكەس سەناتتا ءار وبلىستان, رەسپۋبليكالىق ماڭىزى بار قالادان جانە استانادان ەكى ادامنان وكىلدىك ەتەتىن دەپۋتاتتار بولۋى كەرەكتىگىن اتاپ ءوتتى.
سەنات دەپۋتاتتارىن جاناما سايلاۋ قۇقىعى نەگىزىندە جاسىرىن داۋىس بەرۋ ارقىلى ءماسليحاتتار دەپۋتاتتارى سايلايدى. پارلامەنت سەناتى دەپۋتاتتارىنىڭ سايلاۋىن ۇيىمداستىرۋ مەن وتكىزۋدى ورتالىق سايلاۋ كوميسسياسى باسقارادى, وڭىرلەردە ءتيىستى اۋماقتىق سايلاۋ كوميسسيالارى قامتاماسىز ەتەدى.
ورتسايلاۋكوم توراعاسىنىڭ ورىنباسارى كونستانتين پەتروۆتىڭ بايانداۋىنشا, ءۇش وبلىستىڭ ارقايسىسىنان 2 دەپۋتات سايلانادى: ولاردىڭ بىرەۋى – 2017 جىلعى 28 ماۋسىمدا سايلانعان دەپۋتاتتاردىڭ وكىلەتتىك مەرزىمىنە, ەكىنشىسى – 2020 جىلعى 12 تامىزدا سايلانعان دەپۋتاتتاردىڭ وكىلەتتىك مەرزىمىنە سايلانادى.
كونستيتۋتسياعا سايكەس, 30 جاسقا تولعان, ەل اۋماعىندا كەيىنگى 10 جىلدا جانە ءتيىستى وبلىس اۋماعىندا كەمىندە 3 جىل تۇراقتى تۇرىپ جاتقان قازاقستان رەسپۋبليكاسىنىڭ ازاماتى پارلامەنت سەناتىنىڭ دەپۋتاتى بولا الادى. سونىمەن قاتار ۇمىتكەردىڭ جوعارى ءبىلىمى مەن كەمىندە 5 جىل جۇمىس ءوتىلى بولۋى كەرەك. سوت ارەكەتكە قابىلەتسىز دەپ تانىعان ازاماتتاردىڭ سايلاۋعا جانە سايلانۋعا قۇقىعى جوق. سوتتىلىعى زاڭدا بەلگىلەنگەن تارتىپپەن وتەلمەگەن نەمەسە الىنباعان ادام, سونداي-اق زاڭدا بەلگىلەنگەن تارتىپپەن سىبايلاس جەمقورلىق قىلمىس جانە سىبايلاس جەمقورلىق قۇقىق بۇزۋشىلىق جاساۋدا كىناسىن سوت تانىعان ادام قازاقستان رەسپۋبليكاسى پارلامەنتى سەناتىنىڭ دەپۋتاتتىعىنا كانديدات بولا المايدى.